"Dönərdən zəhərlənmə halları normaldır, çünki..." -Mütəxəssis
Son dönəmlərin kütləvi probleminə çevrilmiş qida zəhərlənməsi, xüsusilə dönərdən zəhərlənmə, ictimai sağlamlıq üçün ciddi təhlükə yaratmaqdadır. Son günlərdə Tovuzda 36 nəfərin kütləvi şəkildə zəhərlənməsi hadisəsi baş verib. Zərərçəkənlərə tibbi yardımlar göstərilib və daha sonra onlar ambulator müalicə üçün evə buraxılıblar. Bu halın sanitar-gigiyenik qaydalara əməl olunmaması ilə bağlı olduğunu aydındır. Qida Təhlükəsizliyi Agentliyi faktla bağlı araşdırmalara başlayıb.
Mövzu ilə bağlı qida eksperti Fərid Səfərov Crossmedia.az-a açıqlama verib.
O, sözlərinə aparılan bir elmi araşdırmadan nümunə gətirərək başlayıb: "Aparılan bir elmi araşdırmada bir həftə boyunca siçovullara ancaq fast food qidalar və şirin qazlı içkilər verilir. Bir həftədən sonra həmin siçovullar çox rahat keçə bildikləri kiçik labirintin çıxışını tapa bilmirlər. Məlum olur ki, onların beyinlərində infeksiya yaranıb, beyin hüceyrələrində dəyişiklik baş verib. Sözümün canı odur ki, cəmi bir həftə ərzində fast food qida qəbulu bu cür nəticələnirsə, onda daimi bu cür qidalanmağın nəticəsini özünüz düşünün!"
O bildirib ki, dönərdən zəhərlənmə halları əslində normaldır: "Çünki, hazırda, demək olar ki, dönər satılan yerlərin əksəriyyətində heç bir gigiyenik normalar gözlənilmir. Ətin hardan, necə alındığı tam aydın deyil, istifadə olunan digər ərzaqların təmizliyi və keyfiyyətinə heç kim cavabdehlik daşımır. Adından da göründüyü kimi, "tez-tələsik" yediyimiz üçün də bu cür hallarla tez-tez rastlaşırıq. Həm də aldığımız qidanın "zəhərli" olub-olmadığını ayırd etmək də çətindir. Bəlkə qoxusunda, görüntüsündə və dadında fərqli nəsə isə hiss etsək, şübhələnə bilərik. Əks halda çox təəssüf ki, zəhərlənmə qaçınılmazdır. Qida zəhərlənməsinin simptomları adətən 2-3 gün ərzində öz-özünə yox olur və heç bir müalicə tələb etmir. Bu dövrdə ishal və qusma nəticəsində itirilən mayenin yerini doldurmaq üçün bol su və yağsız mayelər içmək lazımdır. Qusma varsa ürəkbulanma əleyhinə dərmanlar istifadə edilə bilər. Lakin, çox şiddətli maye itkisinə səbəb olacaq qusma və ishal varsa və ya simptomlar 2-3 gün ərzində keçmirsə, həkimə müraciət edilməlidir. Qida zəhərlənməsi və hətta insan ölümlərinin qarşını almaq üçün mütləq ciddi şəkildə nəzarət olunmalıdır, müəyyən tələblər qoyulmalı və normalar tətbiq olunmalıdır. Bir də ki, axı biz özümüz də düzgün seçim edə bilərik. Sağlamlığımız seçimlərimizdən asılıdır!".
Fatimə Nəbiyeva
15:22 26.06.2025
Oxunuş sayı: 12526
