Səhər yorğun oyanırsınızsa, səbəb fibromialgiya ola bilər
Fibromialgiya geniş yayılmış əzələ və oynaq ağrıları ilə müşahidə olunan, yumşaq toxuma revmatizması kimi tanınan xroniki bir xəstəlikdir. Həkimlər xəbərdarlıq edir ki, bu xəstəlik yalnız fiziki deyil, eyni zamanda psixoloji təsirlər də yaradır və erkən diaqnoz qoyulmadıqda həyat keyfiyyətinə ciddi şəkildə mənfi təsir göstərə bilər.
Crossmedia.az xəbər verir ki, bu barədə "Haber Global" məlumat verib.
Fiziki Təbabət və Reabilitasiya üzrə mütəxəssis Dr. Büşra Yeşil, fibromialgiyanın çox zaman düzgün tanınmadığını, lakin əlamətlərinə diqqət yetirməyin vacib olduğunu bildirib. Onun sözlərinə görə, fibromialgiya əsasən “bütün bədənim ağrıyır” şikayəti ilə həkimə müraciət edən insanlarda müşahidə olunur. Ağrılar boyun, kürək, çiyin və ayaq üstü bölgələrində daha çox toplanır və gündəlik fəaliyyəti xeyli çətinləşdirir.
Dr. Yeşil əlavə edib ki, fibromialgiya yalnız ağrı ilə deyil, eyni zamanda xroniki yorğunluq, səhərlər dincəlməmiş halda oyanma, yuxusuzluq və zehni bulanıqlıqla da müşahidə olunur. Xəstəlik əsasən 30-50 yaş arası qadınlarda daha çox rast gəlinir, lakin kişilərdə və gənclərdə də ortaya çıxa bilər.
Fibromialgiyanın diaqnozu qan analizi və ya rentgenlə qoyulmur. Diaqnoz yalnız xəstənin detallı hekayəsi və fiziki müayinə əsasında müəyyən edilir. Dr. Yeşil vurğulayıb: “Bu xəstəlik digər ehtimallar istisna edildikdən sonra diaqnoz edilir. Dəqiq tanı üçün təcrübəli həkim qiymətləndirməsi vacibdir.”
Xroniki yorğunluğu ciddiyə alın
Mütəxəssis bildirib ki, fibromialgiya müalicəsi fərdi yanaşma tələb edir. Ağrıları və yuxu problemlərini dərmanlarla nəzarət altına almaq mümkündür. Lakin idman xüsusilə üzgüçülük, gəzinti və dartılma hərəkətləri müalicədə əsas rol oynayır. Bununla yanaşı, stresin azaldılması, düzgün yuxu rejimi və sağlam qidalanma da vacibdir.
Dr. Yeşil qeyd edib: “Fibromialgiya xroniki xəstəlik olsa da, düzgün müalicə və yanaşma ilə həyat keyfiyyəti nəzərəçarpacaq dərəcədə yaxşılaşdırıla bilər. Hər xəstəyə özəl müalicə planı tətbiq etməklə həm fiziki, həm də psixoloji rifahın artırılması mümkündür.”
Nigar Rəhimova
17:15 23.06.2025
Oxunuş sayı: 12713
