Rusiya “öz apluasında”: “Cənubi Qafqazda yenidən gərginlik yaratmaq istəyir”
Ermənistanın xarici işlər naziri Ararat Mirzoyan rusiyalı həmkarı Sergey Lavrovla görüşü zamanı Ermənistanın Rusiya ilə bütün istiqamətlərdə əməkdaşlığı davam etdirmək niyyətində olduğunu bildirib. Onun sözlərinə görə, iki ölkənin Xarici İşlər nazirlikləri arasında qarşılıqlı əlaqələr davam edir və humanitar əməkdaşlığın inkişafında müsbət dinamika mövcuddur. A.Mirzoyan həmçinin Avrasiya İqtisadi İttifaqı (Aİİ) çərçivəsində iqtisadi əməkdaşlığın inkişafını da qeyd edib.
Ermənistanın Rusiya ilə əməkdaşlığı davam etdirmək niyyətinin regiondakı geosiyasi vəziyyətə necə təsir edəcəyi ilə bağlı Crossmedia.az saytına açıqlama verən politoloq Qabil Hüseynli Rusiyanın yenidən regionda qarışıqlıq yaratmaq niyyətində olduğunu bildirib: “Fikrimcə, Rusiya regionda yenə qarışıqlıq yaratmaq istəyir. Necə ki, bir zamanlar Ermənistanın əli ilə Bakı və İrəvan arasında qarşıdurma yaratmış, Azərbaycan torpaqlarının işğalında Ermənistana yardım etmişdi.
Azərbaycan Ordusu, xüsusilə qardaş Türkiyənin dəstəyi ilə silahlanmasını genişləndirərək, torpaqlarını azad etmiş və Ermənistan ordusunu darmadağın etmişdir. Bu hadisələrdən sonra Ermənistanda belə bir fikir formalaşdı ki, Rusiya, Kollektiv Təhlükəsizlik Müqaviləsi Təşkilatı (KTMT) çərçivəsində onlara yardım göstərmədi. Ermənistan belə düşünürdü ki, Rusiya gəlib Azərbaycan ərazisində ermənilər üçün döyüşməli idi. Halbuki bu yanaşma yanlışdır. Çünki KTMT-nin mandatına görə, həmin təşkilata daxil olan ölkələrin qoşunları yalnız üzv dövlətin öz ərazisində hərbi müdaxilə edə bilər, başqa ölkənin ərazisinə daxil ola bilməz. Məhz bu səbəbdən Ermənistan və Rusiya arasında müəyyən narazılıqlar və ziddiyyətlər yarandı. Daha sonra Qərb ölkələri Ermənistana yaxınlaşmağa başladı. NATO və Avropa İttifaqına üzvlük vədləri verilərək, Ermənistanı öz tərəflərinə çəkməyə çalışdılar. Ermənistan da bu istiqamətdə müəyyən addımlar atmağa başladı. Lakin son dövrlərdə Ermənistan daxilində Rusiya ilə münasibətlərin yaxşılaşdırılmasını istəyən qüvvələrin sayı artmaqdadır. Bu, hökumətin rəsmi siyasi kursudurmu, bunu dəqiq söyləmək çətindir. Hələlik Ermənistan nə Kollektiv Təhlükəsizlik Müqaviləsi Təşkilatından, nə də Avrasiya İqtisadi Birliyindən çıxmışdır".
Politoloq Ermənistanın hazırda çoxqütblü və qeyri-müəyyən bir siyasi xətt yürütməkdə olduğunu qeyd edib: "Qənaətimə görə, Lavrovun Ermənistana son səfəri zamanı müəyyən müzakirələr aparıldı, müxtəlif vədlər verildi və onlara yardım göstərildi. Bu yardımlar nəticəsində Ermənistan müəyyən dərəcədə şirnikləşdirildi. İndi əsas sual budur: bu şirnikləşdirmə qarşısında Ermənistan hansı siyasi xətti seçəcək? Bu, birmənalı şəkildə söylənilməsi çətin olan məsələdir. Çünki Rusiyada yaşayan güclü erməni diasporası da Ermənistanın Rusiya ilə əlaqələrinin bərpasına və möhkəmlənməsinə təzyiq göstərir. Görək, iki stulda oturmağa çalışan Ermənistan gələcəkdə Qərbə doğru yönələcək, yoxsa əvvəlki kimi Rusiyanın təsiri altında – bir növ "qulluq göstərən tərəf" kimi – qalacaq? Bunu zaman göstərəcək".
Pərvin Hacıyeva
22:38 21.05.2025
Oxunuş sayı: 895
