Ermənistan diaspora və kilsənin siyasi müdaxiləsi olmadan inkişaf edə bilər - Rəy
Ermənistanın dini və ictimai-siyasi mühitində son günlər gərginlik müşahidə olunur. Araqatsotn yeparxiyasının rəhbəri, II Qareginin qohumu olan yepiskop Mkrtiç Proşyan saxlanılıb. Ermənistan mediasının məlumatına görə, ona “mitinqlərin keçirilməsinə məcbur etmə” ittihamı irəli sürülüb. Eyni məsələlərlə bağlı bir neçə din xadimi və mülki şəxsin də saxlandığı bildirilir. Ermənistan İstintaq Komitəsi hadisə ilə bağlı cinayət işi açıb və istintaq hərəkətləri davam edir.
Mövzu barədə Crossmedia.az-a danışan politoloq Tofiq Abbasov bildirib ki, erməni kilsəsinin hakimiyyətə qarşı durması siyasi qarşıdurmanın bir ifadəsidir. Onun sözlərinə görə, 19-cu əsrdən etibarən erməni kilsəsi dini funksiyadan çox siyasi missiya həyata keçirib: “Onların dini qruplaşmaları qondarma təriqət sayılır və dini, siyasi funksiyalara xidmət edib. Sovet dövründə isə “KQB” erməni kilsəsini xarici əlaqələr və informasiya toplamaq üçün istifadə edib. Kilsə hər zaman dövlətçiliyi olmayan xalq üçün siyasi mərkəz rolunu oynayıb".
Tofiq Abbasov əlavə edib ki, hazırda Nikol Paşinyan kilsənin siyasi təsirini minimuma endirməyə çalışır: “Paşinyan real Ermənistan qurmaq istəyir – normal siyasi institutlar, güclü iqtisadiyyat, vətəndaş cəmiyyəti və hüquqi sistem. Diaspora və kilsənin siyasi müdaxiləsi olmadan ölkə inkişaf edə bilər. Kilsəni siyasi aləmə buraxmaq olmaz, onlar ötən əsrin əvvəllərində də Azərbaycan xalqına qarşı yönəlmiş hərəkətlərdə iştirak ediblər. İndi əsas məsələ seçki öncəsi siyasi mühiti kilsədən təmizləməkdir".
Politoloq hesab edir ki, Ermənistanın növbəti seçkilərindən sonra Azərbaycanla sülh sazişi üçün imkanlar yaranacaq və Qarabağ məsələsinin konstitusiyadan çıxarılması zəruridir: “Qarabağ Azərbaycan ərazisidir. Ermənilər orada yaşamaq istəyirsə, Azərbaycan vətəndaşı kimi prosedurları keçə bilərlər".
Mehriban Yariyeva
18:33 16.10.2025
Oxunuş sayı: 7523
