Ermənistan Konstitusiyasında dəyişiklik qaçılmazdır: proses tədricən başlayır
Ermənistan xarici işlər naziri Ararat Mirzoyan bildirib ki, Ermənistanın yeni Konstitusiyasının dəyişdirilməsi və ya qəbul olunması barədə biz 2018-ci ildən etibarən onsuz da danışırıq. Komissiya artıq işini yekunlaşdırmaq üzrədir və çox güman ki, bu məsələ ilə bağlı referendum 2026-cı il parlament seçkilərindən sonra keçiriləcək.
Mövzu ilə bağlı Crossmedia.az-a açıqlamasında Azad Vətən partiyasının sədri Akif Nağı bildirib ki, Paşinyan hakimiyyəti Konstitusiyanı dəyişmək qərarını verib, sadəcə bunu seçkilərdən sonraya saxlayır: “Ermənistan konstitusiyasının dəyişdirilməsi ilə bağlı məsələ həmişə gündəmdə olub. Azərbaycan tərəfi bu təklifi ortaya qoyduğu şərtini bildirdi. Çünki Azərbaycanın ərazi bütövlüyünə iddia vardı. İlk dövrlərdə Ermənistan tərəfi sübut etməyə çalışırdı ki, onların konstitusiyasında belə bir şey yoxdur. Sonra bu sübut olunduqdan sonra o mövqedən çəkildilər. Daha sonra bildirdilər ki, guya Azərbaycanın Konstitusiyasında onlara qarşı hansısa iddia var və ona görə də qarşılıqlı dəyişikliklər olmalıdır. Onu da Azərbaycan onlara başa saldı ki, Azərbaycan Konstitusiyasında Ermənistanla bağlı, Ermənistanın ərazi bütövlüyü ilə bağlı heç bir iddia yoxdur. Ermənistan deyilən bu balaca dövlət Azərbaycan torpaqlarında yaranıb. Azərbaycan tərəfindən Ermənistana güzəştə gedilib. Azərbaycan Milli Şurası ilə Erməni Milli Şurası arasında bununla bağlı razılaşma olub, protokol imzalanıb. Yəni ona görə də bu məsələləri ermənilər azdan-çoxdan başa düşürlər. Anlayırlar ki, Konstitusiyadaki bəndi çıxarmalıdır.
Akif Nağının sözlərinə görə Ermənistan xarici qüvvələrə arxalanmağın faydasız olduğunu başa düşüb: "Onlar artıq başa düşürlər ki, Qərbə və yaxud Rusiyaya söykənmək onlar üçün çıxış yolu deyil. Regionda lider dövlətlər Azərbaycan və Türkiyədir. Onların haqlı mövqeyi ilə hesablaşmaq lazımdır. Azərbaycan haqlı olaraq bildirir ki, biz sizinlə necə münasibət qura bilərik? Sizin törətdiyiniz işğal faktını, azərbaycanlılara qarşı törətdiyiniz cinayətləri, bütün bunlar hamısı, müvəqqəti olaraq demirik, gündə qabartmırıq. Amma siz Konstitusiyada müstəqillik bəyannaməsinə istinad edirsiz, burada Azərbaycana qarşı birbaşa ərazi iddiası var. Biz bunu necə qəbul etməliyik? Ona görə də indi bu məsələ ətrafında müzakirələr gedir. Bir müddət əvvəl erməni tərəfi də bildirdi ki, guya çox yaxın vaxtlarda, hətta bu ilin sonuna qədər sülh sazişi imzalana bilər. Türkiyə xarici işlər naziri də bu məsələ ilə bağlı optimist idi. O vaxtlarda mən fikrimi dedim ki, yeni proseslər onu göstərir ki, seçkiyə qədər Ermənistan rəhbərliyinin belə bir addıma getməsi onlar üçün ciddi risk olardı. Yəni Paşinyanın komandası üçün çox ciddi risk olardı. Çünki əks tərəf Rusiyanın himayəsi ilə Paşinyana qarşı qara piar aparardı. Paşinyanın seçkilərdə də qazanması çox çətin olardı. Ona görə də bu məsələ seçkilərdən sonraya qaldı. Onlar da artıq həm başa düşürlər, başa düşürlər. Yəqin ki, sadəcə olaraq bu mövzu ilə manipulyasiya edirdilər".
O bildirir ki, hökumət artıq cəmiyyətə bu məsələni aşılayır: "Artıq Ermənistan cəmiyyətinə onu çatdırırlar ki, Konstitusiya dəyişdirilməlidir. Bu ideyanı çatdırırlar. Ona görə də bu ifadə işlədirlər ki, artıq iş yekunlaşıb, bəlkə də yekunlaşır və bəlkə də heç başlamayıblar. Amma Paşinyan hakimiyyəti cəmiyyət üçün bu ideanı adiləşdirməyə, populyarlaşdırmağa çalışır ki, konstitusiya dəyişməlidir. Ona görə bu iddianı ortaya atırlar. Burada vaxtın azlığı ilə də bağlı məsələ var. Yəni Konstitusiyanı dəyişəcəklərsə, layihə hazırlanmalıdır. Layihə bənd-bənd ümumi müzakirəyə çıxarılmalıdır, fikirlər öyrənilməlidir. Bu da geniş bir kampaniyadır. Ona görə də hesab edirəm ki, Konstitusiyanı dəyişməklə bağlı qərarları var, sadəcə olaraq bunu seçkilərdən sonraya saxlayırlar. O da başa düşüləndir, məntiqlidir. İndiki şəraitdə onlar yəqin ki, müəyyən bir vaxtdan sonra, əgər onların cəmiyyətindən tələblər olarsa, yavaş-yavaş açıqlama verməyə başlayacaqlar. Amma hər halda, xüsusilə də Azərbaycanın tələbləri ilə bağlı məsələləri yəqin ki, hələlik qabartmayacaqlar. Amma əsas məsələ odur ki, faktiki olaraq, Paşinyan hakimiyyəti Konstitusiyanın qəbul olunması vacibliyini qəbul edir və tədricən öz cəmiyyətinə çatdırır”.
Günel Verdiyeva
18:05 18.10.2025
Oxunuş sayı: 1763
