"Çin "diplomatik güzgü prinsipi"nə əsaslandığını nümayiş etdirmək istəyir" - POLİTOLOQ
Son dövrlərdə Çinlə Avropa İttifaqı arasında münasibətlərdə gərginlik və yaxınlaşmanın paralel şəkildə müşahidə edilməsi diqqət çəkir. Xüsusilə qarşılıqlı sanksiya addımları, tərəflər arasında artan siyasi mübahisələrin bariz göstəricisidir. Avropa Parlamentinin bəzi üzvlərinə qarşı Çin tərəfindən tətbiq edilən sanksiyalar, Aİ-nin oxşar addımlarına cavab olaraq qiymətləndirilə bilər. Bu vəziyyət Aİ-nin Çinlə bağlı yekdil və qəti mövqe ortaya qoya bilmədiyini göstərir. Digər tərəfdən, Avropa liderlərinin Çinə, eləcə də Çin rəhbərliyinin Avropaya səfərləri fonunda ikitərəfli münasibətlərin müəyyən dərəcədə canlanması da baş verir. Lakin bu müsbət impulslar, qarşılıqlı etimadın zəifliyi səbəbindən davamlı sabitliyə çevrilə bilmir.
Beynəlxalq münasibətlər və diplomatiya araşdırmaları mərkəzinin rəhbəri, politoloq bu barərə daha ətraflı Crossmedia.az-a danışıb: "Çinin Avropa Parlamentinin deputatlarına qarşı sanksiya tətbiq etməsinin əsas səbəbi, Aİ Çinə qarşı atdığı oxşar addımlarla bağlı olduğunu vurğulayıb. Eyni zamanda, burada diqqət çəkən məqam ondan ibarətdir ki, Aİ bu məsələdə qəti mövqe nümayiş etdirmir. Belə ki, Aİ nə tam olaraq ABŞ-nin tərəfində dayanır, nə də Çinlə münasibətlərini tamamilə kənarda saxlayır. Son günlərdə Çinlə Aİ arasında müəyyən yaxınlaşma müşahidə olunurdu. Avropa liderlərinin Çinə səfərləri, eləcə də Çin Xalq Respublikasının sədri Si Cinpinin Avropaya etdiyi səfərlər bu prosesin bir hissəsi idi. Həmin səfərlər zamanı qarşılıqlı isti mesajlar səsləndirilmişdi.
ABŞ-da Donald Trampın hakimiyyətə gəlməsindən sonra Rusiya ilə ABŞ arasında müəyyən yaxınlaşma fonunda, Aİ-nin Çinlə münasibətləri daha da intensivləşmişdi. Lakin görünən odur ki, son vaxtlar bu dinamika dəyişməyə başlayıb. Avropanın sərgilədiyi mövqe, Çinin də münasibətini dəyişməsinə səbəb olub".
Onun sözlərinə görə, Çin tətbiq etdiyi sanksiyalarla və verdiyi açıqlamalarla "diplomatik güzgü prinsipi"nə əsaslandığını nümayiş etdirmək istəyir: "Yəni, Aİ-nin atdığı hər bir addımın qarşılığının veriləcəyi mesajı verilir. Çinin bu yanaşması Aİ-nin Çin siyasətçilərinə qarşı davranışlarına və açıqlamalarına verilən simmetrik cavab kimi qiymətləndirilə bilər".
Ləman Həsənova
16:38 01.05.2025
Oxunuş sayı: 5210
