Cəbhədə vəziyyət gərginləşir: Rusiya hücumları artırır
Ukrayna Prezidenti Volodimir Zelenski Rusiya ordusunun bu gecə ölkəsinə 100-dən çox pilotsuz uçuş aparatı (PUA) ilə hücum təşkil etdiyini açıqlayıb.
Telegram hesabından verdiyi yazılı açıqlamada Zelenski Rusiya ordusunun bu gecə ölkəsinin müxtəlif bölgələrinə İHA hücumları həyata keçirdiyini bildirib.
Hücumların əsasən Dnepr, Xarkov və Dobropillya şəhərlərini hədəf aldığını bildirən Zelenski, məktəblər kimi müxtəlif mülki infrastrukturların hədəf alındığını vurğulayıb.
Crossmedia.az "Anadolu" Agentliyinə istinadən xəbər verir ki, Zelenski pilotsuz təyyarələrin hücumları nəticəsində 1 nəfərin öldüyünü, ikisi uşaq olmaqla 46 nəfərin yaralandığını bildirərək, rusların 100-dən çox pilotsuz təyyarə ilə hücum etdiyini qeyd edib.
Zelenski Avropa və ABŞ-ni Rusiyanın hücumlarının qarşısını almaq üçün “Moskva hökumətinə təzyiqi artırmağa” çağırdığını təkrarlayıb.
Digər tərəfdən Ukrayna Baş Qərargah rəisi Aleksandr Sirski yazılı açıqlama verərək, Rusiya-Ukrayna müharibəsində cəbhədəki son hadisələri paylaşıb.
Sirski qeyd edib ki, Rusiya İkinci Dünya Müharibəsində Qələbənin 80-ci ildönümündə müvəqqəti atəşkəs elan etsə də, rusların cəbhəyə hücumları xeyli artıb.
Rusiya ordusunun xüsusilə Ukraynanın Donetsk vilayətinin Pokrovsk şəhəri istiqamətində hücumlarını intensivləşdirdiyini qeyd edən Sirski bunları qeyd edib:
"Əməliyyat və taktiki ümidsizlik düşməni dayandırmır. Bu istiqamətdə onlar inadla bölmələrimizin müdafiəsini yarıb Dnepropetrovsk vilayətinin inzibati sərhəddinə çatmağa çalışırlar".
Sirski bildirib ki, davamlı təzyiqlərə və cəbhəni yarmaq cəhdlərinə baxmayaraq, düşmən tərəf ardıcıl şəkildə itkilər verir və geri çəkilməyə məcbur qalır.
Pərvin Hacıyeva
15:38 30.04.2025
Oxunuş sayı: 1108
