Zelenskiyə son təklif: ABŞ Ukraynadan cavab gözləyir
ABŞ, Rusiya-Ukrayna müharibəsində barışıq əldə etmək məqsədilə Ukrayna Prezidenti Volodimir Zelenskidən cavab gözləyir. Kiyevə təqdim olunan təklifin ən diqqətçəkən maddəsi, Ukraynanın Krımı Rusiyanın bir hissəsi kimi tanıması tələbidir.
Crossmedia.az xəbər verir ki, Amerikanın “Axios” xəbər saytının məlumatına görə, təklif Krımın Rusiyaya aid olduğunu və 2022-ci il işğalı nəticəsində ələ keçirilmiş ərazilərin əksəriyyətinin Rusiyanın faktiki nəzarətində olduğunu qeyri-rəsmi şəkildə qəbul etməyi nəzərdə tutur. Axios-un bildirdiyinə görə, keçən həftə təqdim olunan təklif həmçinin ABŞ-nin 2014-cü ildən bəri Rusiyaya tətbiq etdiyi sanksiyaların ləğvini və Rusiyanın işğalı altında olan Xarkov bölgəsinin kiçik bir hissəsinin Ukraynaya qaytarılmasını ehtiva edir.
Təklifə görə, Zaporijya Atom Elektrik Stansiyası Ukrayna ərazisi kimi tanınacaq, lakin ABŞ tərəfindən idarə olunacaq və həm Ukrayna, həm də Rusiyaya elektrik təmin edəcək.
Digər ABŞ mediasının məlumatlarına görə, Rusiya Prezidenti Vladimir Putin cəbhə xəttinin dondurulmasını təklif edir, ABŞ isə Krımın Rus torpağı kimi tanınmasını istəyir. Axios-un bildirdiyinə əsasən, ABŞ-nin ötən həftə Parisdə Ukraynalı rəsmilərə təqdim etdiyi sənəd bir səhifəlik olub və ABŞ Prezidenti Donald Tramp tərəfindən “son təklif” kimi təqdim edilib.
Amerikanın “Wall Street Journal” qəzeti isə “Rusiyaya qarşı iki əsas tələb irəli sürüldüyünü” yazır: Krımın Rusiyaya aid olduğunun tanınması və Ukraynanın NATO-ya üzvlüyündən imtina etməsi.
Digər tərəfdən, Zelenski atəşkəs qüvvəyə mindikdən sonra Rusiya ilə danışıqlara açıq olduğunu bildirib, lakin “Ukraynanın Krımın işğalını hüquqi cəhətdən tanımadığını” vurğulayıb.
Ağ Ev isə, tərəflərin yaxın zamanda razılığa gəlməməsi halında danışıqlardan geri çəkiləcəyini israrla bildirir. Trampın təklifi, Ukrayna Prezidenti Volodimir Zelenskinin, əvvəllər Krımın və Ukraynanın şərqindəki dörd bölgənin işğalını qəbul etmədiyi mövqeyindən ciddi güzəştlərə getməsini tələb edir.
Mədinə Cəlilova
21:27 23.04.2025
Oxunuş sayı: 651
