Xorvatiya İkinci Dünya Müharibəsi qurbanlarını yad edib
Xorvatiya İkinci Dünya Müharibəsində nasist rejiminin dəstəklədiyi marionet hökumət tərəfindən öldürülən on minlərlə insanın xatirəsini anıb.
Crossmedia.az xarici mediaya istinadən bildirir ki, aprelin 22-də 1945-ci ildə Yasenovac düşərgəsindən yüzlərlə məhbusun qaçmağa cəhdinin 80 illiyi münasibətilə keçirilən mərasimlərdə Xorvatiya rəsmiləri, yəhudi, serb, qaraçı və antifaşist təşkilatların nümayəndələri iştirak ediblər.
Rəsmi məlumatlara əsasən, Yasenovac düşərgəsində 83 mindən çox insan öldürülüb. Lakin bəzi serb mənbələri bu sayın yüz minlərlə olduğunu iddia edir. “Balkan Auschwitz” kimi tanınan düşərgədə qadın və uşaqlar da daxil olmaqla minlərlə insan vəhşicəsinə işgəncələrə və edamlara məruz qalıb.
Mərasim zamanı iştirakçılar gül və əklillər qoyub, şamlar yandırıb, düşərgənin dəmir yolu ilə işarələnmiş cığırında anım yürüşü ediblər. Xorvatiyanın Baş naziri Andrey Plenkoviç bildirib ki, bu cür cinayətlər heç vaxt unudulmamalı və bir daha təkrarlanmamalıdır.
Zəhra Ağayeva
13:40 23.04.2025
Oxunuş sayı: 502
