ABŞ Qəzzaya səfər etmiş şəxslərin viza müraciətlərində sosial media araşdırması aparacaq
ABŞ prezidenti Donald Tramp rəhbərliyində verilən yeni əmrlə, 1 yanvar 2007-ci il tarixindən sonra Qəzza zolağına getmiş şəxslərin viza müraciətləri zamanı sosial media hesabları təhlil ediləcək. Bu qərar, ABŞ Dövlət Departamentinin daxili sənədinə əsaslanır.
Crossmedia.az xəbər verir ki, “Reuters” xəbər agentliyinin əldə etdiyi məlumata görə, ABŞ Dövlət Katibi Marco Rubio tərəfindən imzalanmış 17 aprel tarixli rəsmi sənəddə, bu sosial media təhlilinin həm miqrasiya, həm də qeyri-miqrasiya vizələri üçün tətbiq olunacağı bildirilib. Tədbir, qeyri-kommersiya təşkilatlarının əməkdaşlarını və diplomatik və ya rəsmi vəzifə ilə Qəzzada olmuş şəxsləri də əhatə edəcək.
Sənəddə, sosial media araşdırması nəticəsində təhlükəsizliklə bağlı mənfi və ya şübhəli məlumat əldə olunarsa, bu halda müraciətçinin ABŞ üçün “milli təhlükə riski” daşıyıb-daşımadığını müəyyənləşdirmək məqsədilə Təhlükəsizlik Məşvərət Rəyi (SAO) prosesinin başladılacağı qeyd olunub.
Sözügedən qərar ABŞ-nin bütün diplomatik nümayəndəlik və konsulluqlarına göndərilib. Bu addım, son dövrlərdə ABŞ-da vizaları ləğv edilən və ya saxlanılan şəxslərin artdığı bir dövrə təsadüf edir. Bu şəxslər arasında türk doktorant Rümeysa Öztürk və fələstinli tələbə aktivistlər Mohsen Mahdawi və Mahmud Halil kimi, Fələstinə verdikləri dəstəyi açıq şəkildə ifadə edənlər də var.
ABŞ Dövlət Departamentinin sözçüsü daxili sənəd barədə şərh verməkdən imtina edib, lakin “ABŞ-yə gəlmək istəyən hər kəsin əhatəli təhlükəsizlik yoxlamasından keçdiyini” bildirib. Sözçü, “Tramp administrasiyası, viza prosesi vasitəsilə ən yüksək milli təhlükəsizlik və ictimai təhlükəsizlik standartlarını qorumaq məqsədilə fəaliyyət göstərir,” deyə vurğulayıb.
Açıqlamada, təhlükəsizlik yoxlamalarının yalnız viza müraciəti zamanı deyil, viza müddəti ərzində də davam etdiyi və bu prosesin ABŞ-yə girişə hələ də uyğunluğun təmin edilməsinə yönəldiyi qeyd olunub.
Mədinə Cəlilova
21:45 18.04.2025
Oxunuş sayı: 1164
