Zelenskidən manevr: "ABŞ ilə saziş imzalanmaya bilər"
Ukrayna ilə ABŞ arasında son dövrlərdə intensivləşən münasibətlər və xüsusilə də mübahisəli saziş ətrafında yaranan gərginlik rəsmi Kiyevin siyasi manevrlər etməsinə səbəb olub. ABŞ-nin təklif etdiyi sənədin məzmunu və bu sənədin doğura biləcəyi nəticələr Prezident Volodemir Zəlenskinin mövqeyinə birbaşa təsir göstərməkdədir. Bu çərçivədə Ukraynada seçkilərin keçirilməsi məsələsi sadəcə daxili siyasət məsələsi deyil, həm də beynəlxalq güc oyunlarının bir parçasına çevrilib.
Seçkilərin keçirilməsi Zelenskiyə nə qazandıracaq? Seçkilər sazişə nə cür təsir göstərə bilər?
Mövzu ilə bağlı politoloq Elçin Xalidbəyli Crossmedia.az-a açıqlama verib: "Zelenskinin Ukraynada seçki keçirmək niyyəti böyük ehtimalla olduqca praqmatik siyasi manevrdir. Çünki ABŞ Ukraynaya bir saziş təklif edib və həmin sazişin imzalanmasını israrla tələb edir. Əgər həmin saziş imzalanarsa, Ukraynanın təbii sərvətləri, infrastrukturları və dövlət gəlirləri tamamilə ABŞ-ın nəzarəti altına keçəcək. Sazişin məzmunundan belə anlaşılır ki, ABŞ Ukraynanı talan etməyə başlayacaq. Üstəlik, həmin saziş öz məzmununa görə Ukraynanın ABŞ-nin müstəmləkəsinə çevrilməsi üçün hüquqi baza yaradacaq. Ona görə də rəsmi Kiyev həmin sənədin imzalanmasını istəmir. Son məlumatlara görə, rəsmi Kiyev ABŞ-nin imzalanmasını israrla tələb etdiyi sazişin Ukrayna Konstitusiyasına və Ukraynanın Avropaya inteqrasiya proqramına uyğun olmadığını əsas gətirir. Ancaq təbii ki, bu, Vaşinqtonun israrlarına müqavimət göstərmək üçün yetərli deyil. Ona görə də rəsmi Kiyev növbəti manevrini etməyə çalışır".
Politoloq qeyd edib ki, seçkilərin keçirilməsi Zelenskiyə manevr imkanı qazandıracaq:
"O, seçkilərin keçirilməsi ilə bağlı qərar qəbul etməyə daha çox meyillidir. Bu, Ukraynaya, xüsusilə də Zelenskiyə müəyyən manevr imkanları qazandıra bilər. Birincisi, Ukraynanın tarixinə ölkəni ABŞ-nin müstəmləkəsinə çevirən dövlət başçısı kimi düşmək təhlükəsindən yayınmış olacaq. Digər tərəfdən, seçkilərin keçirilməsi və hakimiyyətin ötürülməsi kifayət qədər zaman tələb edən məsələlərdir. Ukrayna bununla ABŞ-nin tələb etdiyi sazişin imzalanması ilə bağlı prosesi mümkün qədər uzatmaq və vaxt qazanmaq imkanı əldə edə bilər. Həmin müddətdə situasiya dəyişərsə, Ukrayna ya sazişin məzmununun dəyişdirilməsinə, yaxud da imzalanmamasına nail ola bilər".
Ayhan Ağarzayev
14:47 02.04.2025
Oxunuş sayı: 12927
