Lukaşenko siyasi səhnədə: "Sərt siyasi mövqeyi ilə seçilir"
Aleksandr Lukaşenko rəsmi olaraq Belarus Prezidenti vəzifəsinin icrasına başlayıb. Bu gün Minskdə keçirilən andiçmə mərasimi ilə o, növbəti dəfə ölkə rəhbərliyini öz üzərinə götürüb.
Belarusda prezident seçkiləri 2025-ci il yanvarın 26-da keçirilib və Lukaşenko 86,82 % səs toplayaraq yenidən prezident seçilib. O, 1994-cü ildən bəri Belarusun dövlət başçısıdır və uzun illərdir ölkədə siyasi sabitliyin təmin edilməsində əsas fiqurlardan biri hesab olunur.
Lukaşenko uzun illərdir ki, siyasi səhnədədir. O, 30 ildən çoxdur Belarusa rəhbərlik edir.
Bu gün dünyada çox ciddi siyasi kataklizmlərin baş verdiyi, Qərblə Şərqin üz-üzə gəldiyi bir vaxtda yeni prezidentlik dövründə Lukaşenkodan gözləntilər az deyil.
İqtisad elmləri doktoru, professor, Milli Məclisin 4 çağrış deputatı Rüfət Quliyev bu barədə fikirlərini Crossmedia.az-la bölüşüb: "Belarus gözəl ölkədir və gözəl xalqı var. Azərbaycanla siyasi, iqtisadi və beynəlxalq münasibətləri yüksək səviyyədə inkişaf edib. Həm dövlət rəhbərləri, həm də xalqlar arasında sıx əlaqələr mövcuddur. Hər bir ölkənin özünəməxsus inkişaf yolu var. Belarus da bu baxımdan fərqlənir. Onlar sovet sistemindən qalan bir çox müsbət xüsusiyyətləri qoruyub saxlayıblar. SSRİ dağılandan sonra ölkənin iqtisadiyyatı çökmedi, iqtisadi modelini qoruyub saxladı. Belarusda insanların həyat səviyyəsi kifayət qədər stabildir, insanlar işləyir və yaxşı yaşayırlar".
R.Quliyev qeyd edib ki, Avropa İttifaqı Belarusun siyasətini qəbul etmir və bəzi ölkələri öz standartlarına uyğun yaşamağa məcbur etməyə çalışır. "Lakin hər bir xalq öz ənənəsinə, tarixinə uyğun yaşamalıdır. Belarusun da öz yolu var və xalq bunu qəbul edir. Ölkədə məhsulların keyfiyyətinə ciddi nəzarət edilir, keyfiyyətsiz məhsulların gətirilməsi mümkün deyil. Hətta bir dəfə xaricdən gətirilən keyfiyyətsiz konyak spirti standartlara uyğun olmadığı üçün müsadirə edilərək məhv edilmişdi. Belarus məhsullarının yüksək keyfiyyəti hətta Avropada da tanınır. Demokratiya anlayışı hər ölkədə fərqli formada tətbiq edilir. Belarusda xalqın əksəriyyəti mövcud idarəetmə sistemini dəstəkləyir. Ölkədə hələ də insanlar növbəyə dayanaraq dövlətdən mənzil ala bilirlər. İqtisadi problemlər, devalvivasiya və inflyasiya mövcud olsa da, Belarus öz yolunu davam etdirir və Rusiya ilə iqtisadi əlaqələrini qoruyur".
Siyasətçi vuğurlayıb ki, Lukaşenko sərt siyasi mövqeyi ilə seçilir və görünür ki, bu, xalqın tələbidir. "Hər bir ölkənin öz idarəetmə modeli və milli maraqları var. Azərbaycan da bu baxımdan Belarusa bənzəyir – öz yolumuz var, iqtisadiyyatımızı öz modelimizə uyğun inkişaf etdiririk. Buna baxmayaraq, iki ölkə arasında münasibətlər həmişə yaxın olub. Belarusun səhiyyə və təhsil sistemi yüksək inkişaf edib, güclü mütəxəssisləri var. Ölkə İT sahəsində də mühüm nailiyyətlər əldə edib və internet texnologiyalarında irəlidə gedən ekspertlər arasında belaruslular da var. Belarus texnoloji baxımdan super güc olmasa da, bəzi sahələrdə öz sözünü deməyi bacarır".
Xumar Emilqızı
16:35 25.03.2025
Oxunuş sayı: 13969
