Gündəm
Rumıniya Ermənistan və Azərbaycan arasında sülh danışıqlarının başa çatmasını alqışlayır
Rumıniya Xarici İşlər Nazirliyi Ermənistan və Azərbaycan arasında sülh sazişi üzrə danışıqların yekunlaşmasını yüksək qiymətləndirib.
Crossmedia.az xəbər verir ki, nazirlik rəsmi açıqlamasında Ermənistanın xarici işlər naziri Ararat Mirzoyanı və Azərbaycanın xarici işlər naziri Ceyhun Bayramovu "yorulmaz səyləri və cəsarətlərinə görə" təbrik edib.
Bəyanatda bildirilib ki, "davamlı sülh sabitliyin, rifahın və regionun böyük potensialının açılmasının açarıdır". Rumıniya regionda sabitliyin təmin edilməsini və tərəflər arasında sülh sazişinin imzalanmasını dəstəklədiyini bir daha vurğulayıb.
Qeyd edək ki, Azərbaycan və Ermənistan Xarici İşlər Nazirlikləri birgə bəyanat yayaraq, Azərbaycan və Ermənistan arasında sülh və dövlətlərarası münasibətlərin qurulması haqqında Saziş layihəsinin mətni üzrə danışıqların yekunlaşdığını bildirib.
18:59 14.03.2025
Oxunuş sayı: 2443
