Azərbaycan və Surinam XİN-ləri arasında birinci siyasi məsləhətləşmələr keçirilib
Azərbaycan və Surinam Xarici İşlər nazirlikləri arasında birinci siyasi məsləhətləşmələr keçirilib.
Azərbaycanın Xarici İşlər Nazirliyindən Crossmedia.az-a verilən məlumata görə, məsləhəlləşmələr xarici işlər nazirinin müavini Elnur Məmmədovun rəhbərliyi ilə Azərbaycanın hökumət missiyasının 3-5 mart tarixlərində baş tutan Surinam səfəri çərçivəsində həyata keçirilib.
Bildirilib ki, missiyanın tərkibinə İqtisadiyyat, Energetika, Elm və Təhsil, Kənd Təsərrüfatı Nazirliyi, Azərbaycan Respublikasının Dövlət Neft Şirkəti (SOCAR) və “AzərGold” QSC nümayəndələri olub.
Səfər zamanı Elnur Məmmədov Surinamın xarici işlər, beynəlxalq biznes və beynəlxalq əməkdaşlıq naziri cənab Albert Ramdin, nazir müavini xanım Miriyam Makkintoş ilə görüşüb.
Görüşlərdə Azərbaycanın COP29-a sədrliyi çərçivəsində ötən ilin noyabr ayında ölkəyə səfər etmiş Surinamın Prezidenti Çan Santoxi ilə Azərbaycan Prezidenti İlham Əliyevin görüşünun nəticəsi olaraq Surinama Azərbaycan hökumət missiyasının gəlişi qarşı tərəfdən yüksək qiymətləndirilib və hər iki tərəf üçün maraq doğuran məsələlər, o cümlədən yüksək səviyyəli səfərlərin mübadiləsi, sərmayə, nəqliyyat, yaşıl enerji, humanitar, elm və təhsil, mədəniyyət və digər mümkün sahələrdə əməkdaşlıq imkanları müzakirə edilib.
Səfər çərçivəsində Azərbaycan Xarici İşlər Nazirliyi ilə Surinam xarici işlər, beynəlxalq biznes və beynəlxalq əməkdaşlıq nazirliyi arasında birinci siyasi məsləhətləşmələr keçirilib. Siyasi məsləhətləşmələrə Azərbaycan tərəfindən xarici işlər nazirinin müavini Elnur Məmmədov, qarşı tərəfdən isə Surinamın xarici işlər, beynəlxalq biznez və beynəlxalq əməkdaşlıq nazirinin müavini Miriyam Makkintoş rəhbərlik edib. Siyasi məsləhətləşmələr zamanı ikitətəfli və çoxtərəfli siyasi əlaqələrin hazırkı vəziyyəti və perspektivləri müzakirə olunub.
Elnur Məmmədov Azərbaycanın xarici siyasət prioritetləri mövzusunda Surinamın Xarici İşlər Nazirliyində təqdimatla çıxış edib. Təqdimatdan sonra Elnur Məmmədov Surinamın “CDS” dövlət media agentliyinə müsahibə verib.
Hökumət missiyasının üzvləri üçün Surinamın müvafiq dövlət qurumlarının yüksək vəzifəli rəsmiləri ilə görüşləri təşkil edilib. Müxtəlif sahələrdə investisiya imkanları barədə ətraflı təqdimatlar edilib, əməkdaşlıq perspektivləri haqqında məzmunlu müzakirələr aparılıb.
Səfər zamanı Azərbaycan hökumət missiyasının üzvləri “Staatsoile” dövlət neft şirkətində görüş keçirib, “Tout Lui Fo” neft emalı zavoduna tanışlıq turu təşkil edilib.
10:48 05.03.2025
Oxunuş sayı: 12539
