Bakıda “Stratcom Public Forum”u çərçivəsində panel müzakirə keçirilib
Bakıda Türkiyə Prezident Administrasiyasının Kommunikasiya İdarəsi və “Stratcom Public Forum”un təşkilatçılığı ilə "Daha ədalətli bir dünya mümkündür" adlı panel müzakirə keçirilib.
Crossmedia.az xəbər verir ki, Türkiyə Prezident Administrasiyasının Kommunikasiya İdarəsinin rəhbəri Fəxrəddin Altun tədbirə ünvanlandığı videomüraciətdə BMT-nin fəaliyyətindəki problemlərdən danışıb.
BMT-də islahatların zəruriliyi və ədalətli dünya axtarışı
O, BMT daxilində islahatları zəruri sayıb: “Türkiyə Prezident Administrasiyasının Kommunikasiya İdarəsi olaraq biz 20 fərqli ölkədə “Stratcom Public Forum” çərçivəsində təşkil olunan tədbirləri dəstəkləyirik. BMT-nin fəaliyyətindəki problemlər dünyada sülhün bərqərar edilməsini mürəkkəbləşdirir. Türkiyənin Prezidenti Rəcəb Tayyib Ərdoğanın yanaşması BMT daxilində islahatların aparılmasına dəstək verilməsi yönündədir. Ölkəmizin təşkilatçılığı ilə keçirilən tədbirlər ayrı-ayrı cəmiyyət nümayəndələri arasında dialoqu dəstəkləyir. Bugünkü tədbirin daha ədalətli dünya qurulması istiqamətindəki tədbirlərə təkan verəcəyinə inanırıq”.
Beynəlxalq sistem və qlobal sülhün qarşısında maneələr
Türkiyənin Azərbaycandakı səfirliyinin media müşaviri Alptekin Cihangir İşbilir beynəlxalq sistemin qlobal sülhü təmin etməkdə çətinliklərlə qarşılaşdığını vurğulayıb:
“Dünya sistemində islahatlara, dəyişikliklərə ehtiyac var. Bu məqsədlə tutarlı tədbirlərin görülməsi son dərəcə zəruridir. Dünya miqyasında sülhə və təhlükəsizliyə töhfə vermək üçün bir sıra qurumlar mövcuddur. Müharibələrin qarşısına sədd çəkmək elə sülhün təminatı mənasına gəlir. Ancaq biz qlobal qurumların bu qırğınları daha da alovlandırdığının şahidi olmaqdayıq”.
Beynəlxalq Münasibətlərin Təhlili Mərkəzinin şöbə müdiri Cavid Vəliyev beynəlxalq münasibətlər sistemi ilə ədalətin təmin olunmasının tərs mütənasib olduğunu qeyd edib.
Şöbə müdiri əlavə edib ki, beynəlxalq münasibətlər sistemində ədalət axtarışları İkinci Dünya müharibəsindən sonra ortaya çıxan yeni dünya sistemi ilə bilavasitə əlaqədardır.
“Biz 30 illik ədalətsizliyi özümüz bərpa etmək məcburiyyətində qaldıq. Bizim özümüzün bu sistemin daxilində ədalət axtarışlarımızda başlıca məqsəd İkinci Dünya müharibəsindən sonra ortaya çıxan yeni dünya sistemi bilavasitə əlaqədardır. Bu nizam artıq yoxa çıxmaqda olduğu üçün ölkələrarası münasibətlərdə yeni nizamlanma sisteminin formalaşmasına ciddi ehtiyac var”.
Azərbaycan Milli Müdafiə Universitetinin rektor köməkçisi Nurettin Acır deyib ki, beynəlxalq münasibətlərdə ən başlıca problem bir sıra beynəlxalq təşkilatın yetərli fəaliyyət göstərməməsi və bütün insanlara ədalətli şəkildə münasibət göstərməmisidir: “Təhlükəsizlik sahəsində ən təsirli qurum olan Birləşmiş Millətlər Təşkilatı özündə 5 daimi, 190 qeyri-daimi üzv dövləti birləşdirir. Qeyri-daimi əsaslarla üzv olan ölkələrin dünyada təhlükəsizliyi təmin etmək istiqamətində həyata keçirə biləcəyi heç nə mövcud deyil. Bu gün dövlət və cəmiyyətlərdə güclü dəyişikliklərə səbəb olan bir vasitə varsa, bu da texnologiyadır. Bu gün biz süni intellekt sahəsində güclü inqilabın şahidi oluruq. Belə bir şəraitdə daha ədalətli həyat qurmaq çətin olsa da, mümkündür. Planetimizdə bütün insanlara bəs edəcək səviyyədə mənbələr mövcud olsa da, bu gün onların bərabər bölünməməsindən təəssüflənirik. Bütün qlobal anlaşılmazlıqlar məhz bundan qaynaqlanır. Dünya səviyyəsində qida və səhiyyə sahəsinə ayrılmalı olan xərclər bərabər bölünmür. Ölkəmiz bu kimi məsələlərin nizamlanması üçün ədalətli bir ölkədir. Belə bir dövrdə güc, qardaşlıq və həmrəyliyimizi daha da gücləndirərək, yeni səviyyəyə yüksəltməliyik”.
Media və Ədalət: İnformasiya manipulyasiyası problemi
APA Media Group-un baş direktoru Vüsalə Mahirqızının sözlərinə görə, bu gün danışılan önəmli mövzu - daha ədalətli bir dünya üçün çalışmaq, əlbəttə ki, mediasız olmaz: “Amma bu peşənin təmsilçisi olaraq, təəssüflənərək, bu gün medianın dünyanın ədaləti üçün çalışdığını söyləməyə çətinlik çəkirəm”.
Vüsalə Mahirqızı qeyd edib ki, bəzi hallarda medianın işi dünyada ədalətin qurulmasından daha çox, müharibələrin alovlanmasına və informasiya manipulyasiyalarına yol açır: “Bir dəfə Qərb ölkələrinin səfirlərindən biri mənə Azərbaycan mediasının Rusiya-Ukrayna müharibəsi ilə bağlı ədalətli və obyektiv mövqe ortaya qoyduğunu, hər iki tərəfin mövqeyinə yer verdiyini, bunu diqqətlə izlədiklərini və təşəkkür etdiyini bildirdi. O zaman da bildirdim ki, medianın funksiyası budur, medianın işi münaqişə tərəflərindən birinin mövqeyini işıqlandırmaq, digərini isə ofsaydda saxlamaq deyil. Bu, yalnız münaqişə tərəfi olan ölkənin mediası üçün başa düşülən ola bilər”.
Türkiyə-Azərbaycan ortaq media platformasının rolu
Türkiyə Maarif Vəqfinin Azərbaycan üzrə təmsilçisi Sərdar Gündoğan Türkiyə ilə Azərbaycan arasında təhsil sahəsindəki əlaqələrə toxunub:
“Ölkəmizdə təhsil alan 136 min əcnəbi tələbə təhsil almaqdadır ki, onların da 27 min nəfəri azərbaycanlıdır. Türkiyə Maarif Vəqfi olaraq təşkilatımızın 56 ölkədə rəsmi nümayəndəlikləri fəaliyyət göstərməkdədir. Vəqfimiz fəaliyyət göstərdiyi ölkələrdə 70 min nəfər gənci təqaüdlə təmin edir”.
Panellərdən sonra sual-cavab sessiyası olub.
Tədbirin sonunda tədbirin iştirakçılarına xatirə hədiyyələri təqdim olunub.
17:48 04.03.2025
Oxunuş sayı: 6889
