Putin-Tramp görüşünün reallaşma perspektivi yüksəkdir -ŞƏRH
Beynəlxalq münasibətlər sistemində ABŞ və Rusiya arasında münasibətlərin normallaşdırılması qlobal siyasətin əsas məsələlərdəndir. Hər iki ölkə müxtəlif siyasi və iqtisadi maraqlara sahib olsa da, strateji baxımdan qarşılıqlı əməkdaşlığı özünü qabarıq şəkildə göstərir. Bu baxımdan ABŞ Prezidenti Donald Trampın mümkün dönüşü fonunda Moskva ilə münasibətlərin yenidən qurulması və Rusiya lideri Vladimr Putinlə görüş ehtimalı xüsusi maraq doğurur.
Tərəflər arasında münasibətlərin perspektivi barədə Crossmedia.az-a açıqlamasında politoloq Əli Zülfüqaroğlu qeyd edib ki, o, Putinlə Tramp arasında görüş ehtimalını yüksək qiymətləndirir: "Həm Moskva, həm də Vaşinqton münasibətlərin normallaşdırılmasında maraqlıdır. Hər iki ölkənin prioritet hesab etdiyi bir sıra istiqamətlər mövcuddur. Məsələn, Rusiya üzərində ciddi sanksiyalar tətbiq olunur və bu, ölkə iqtisadiyyatına əhəmiyyətli dərəcədə problem yaradır. Rusiya da çalışır ki, bu sanksiyalar aradan qaldırılsın və beləliklə ölkədə iqtisadi vəziyyət normallaşdırılsın. Eyni zamanda ABŞ-inin də daxili iqtisadi vəziyyəti kifayət qədər problemlidir. Bir sıra iqtisadçı ekspertlər hesab edirlər ki, rəsmi Vaşinqtonun sanksiyalar tətbiq etməsi ölkə daxilində də iqtisadi çətinliklərə yol açır. Buna görə də Trampın prioritetləri arasında əvvəlcə ABŞ iqtisadiyyatını düzəltmək və müharibələrdən yayınmaq mövcuddur".
Ə.Zülfüqaroğlu vurğulayıb ki, Rusiya ilə münasibətlərin normallaşdırılmasının kökündə bir sıra təməl səbəblər də var: "İdeoloji, siyasi, iqtisadi və digər müstəvilərdə bunu qiymətləndirmək mümkündür. Bir digər məsələ isə ABŞ-nin Çin ilə rəqabət mühitində Rusiyanın dəstəyinə ehtiyac duymasıdır. Rusiya- Çin İttifaqının əngəllənməsi və beləliklə Rusiya ilə münasibətləri normallaşdırandan sonra Çinlə iqtisadi cəhətdən rəqabət imkanlarını gücləndirmək istəyir. Eyni zamanda, Ukrayna məsələsi də var. Bu, Rusiya ilə ABŞ arasındakı münasibətlərin normallaşdırılması istiqamətində əsas şərtdir. Bu istiqamətdə iki ölkə arasındakı müəyyən razılaşmaların əldə olunması bir sıra geosiyasi proseslərlə bağlı problemlərin meydana çıxmasına səbəb olur".
Politoloq, həmçinin bildirib ki, Avropa İttifaqı (Aİ) ilə ABŞ arasında ziddiyyətlərin dərinləşməsi Rusiya üçün yeni perspektiv imkanları açır:
"Rusiyanın Aİ-yə təzyiq kartı kimi istifadə olunma ehtimalları artır, bu da eyni zamanda Rusiya ilə ABŞ arasında konsensusun əldə olunması üçün zəmin formalaşdırır. Eyni zamanda, Rusiya ilə ABŞ arasında dövlətlərarası münasibətlər sisteminin normallaşdırılması istiqamətində sürətli prosesin getdiyini nəzərə alsaq, Putin-Tramp görüşünün reallaşma perspektivini yüksək dəyərləndirmək mümkündür".
Fidan Xəlilova
16:17 04.03.2025
Oxunuş sayı: 6097
