Deputat beynəlxalq ictimaiyyətə səsləndi: "Bu məsələdə Azərbaycana kömək edilməlidir"
Azərbaycan xarici işlər nazirinin müavini Elnur Məmmədov Cenevrədə İnsan Hüquqları Şurasının 56-cı Sessiyasının Yüksək Səviyyəli İclasında çıxışı zamanı bildirib ki, Azərbaycanın işğaldan azad edilmiş ərazilərinin geniş miqyasda minalanması bərpa və quruculuq işlərinin qarşısında ciddi maneə olaraq qalır.
O vurğulayıb ki, 2020-ci ildə münaqişənin başa çatmasından sonra 400-ə yaxın azərbaycanlı, o cümlədən mülki şəxslər minaların qurbanı olub. Bu, yalnız humanitar deyil, həm də insan hüquqları ilə bağlı ciddi bir problemdir.
Azərbaycan beynəlxalq ictimaiyyəti humanitar minatəmizləmə fəaliyyətinə daha çox dəstək verməyə çağırır. Bu dəstək minaların yaratdığı təhlükənin aradan qaldırılması, mina qurbanlarının reabilitasiyası və işğaldan azad edilmiş ərazilərdə insanların təhlükəsiz yaşaması üçün vacibdir.
Elnur Məmmədov beynəlxalq təşkilatları və dövlətləri bu məsələyə daha həssas yanaşmağa və Azərbaycanın minatəmizləmə səylərinə töhfə verməyə səsləyib.
Bu barədə Crossmedia.az-a açıqlama verən Milli Məclisin deputatı Naqif Həmzəyev bildirib ki, Azərbaycanın işğaldan azad etdiyi torpaqlarda aparılan bərpa-quruculuq işləri sürətlə davam etsə də, qarşıda ciddi maneələr var: "İşğal dövründə Ermənistan bu ərazilərdə maddi-mədəni irsimizi dağıtmaqla kifayətlənməyərək, torpaqlarımızı minalarla çirkləndirib. Bu addım təkcə ekoloji və iqtisadi problemlərə səbəb olmayıb, eyni zamanda Böyük Qayıdış prosesini də ləngidib. Son beş il ərzində Azərbaycan dövləti bu ərazilərin minalardan təmizlənməsi üçün genişmiqyaslı tədbirlər həyata keçirir. Lakin mina təmizləmə prosesi olduqca mürəkkəb, riskli və böyük maliyyə vəsaiti tələb edən bir işdir. Azərbaycan bu məqsədlə xeyli resurs ayırsa da, prosesin daha sürətli və effektiv həyata keçirilməsi üçün beynəlxalq ictimaiyyətin dəstəyinə ehtiyac var".
Parlamentari söyləyib ki, Ermənistan minalanmış ərazilərin xəritələrini Azərbaycana təqdim etsə də, bu sənədlərin yalnız 15-20 faiz dəqiqliyə malik olduğu məlum olub: "Bu isə mina təmizləmə prosesini qat-qat çətinləşdirir və insanların həyatını risk altında saxlayır. Bununla belə, Azərbaycan bu məsələdə tək qalıb. Hazırda Böyük Britaniya istisna olmaqla, beynəlxalq ictimaiyyətdən əlavə dəstək müşahidə olunmur. Halbuki, bu, yalnız Azərbaycanın deyil, ümumilikdə beynəlxalq təhlükəsizliyin bir hissəsi olan humanitar bir məsələdir".
Deputat qeyd edib ki , Azərbaycanın mina təmizləmə sahəsində xüsusi qurumları və peşəkar mütəxəssisləri formalaşıb: "Ötən beş ildə bu qurumlar böyük təcrübə əldə ediblər və dəstək aldıqları təqdirdə prosesi daha da sürətləndirə bilərlər. Buna görə də beynəlxalq təşkilatlar və dövlətlər Ermənistana təzyiq göstərməli, Azərbaycana mina təmizləmə prosesində kömək etməlidirlər".
N.Həmzəyev, həmçinin vurğulayıb ki , minaların yerləşdirilməsi və Azərbaycanın maddi-mədəni irsinin məhv edilməsi beynəlxalq hüquqa zidd olan hərbi cinayətlərdir: "Ermənistan bu əməllərinə görə məsuliyyət daşımalı, Azərbaycana vurduğu maddi və mənəvi zərərin əvəzini ödəməlidir. Artıq Azərbaycan dövləti bu istiqamətdə beynəlxalq məhkəmələrə müraciətlər edib və bütün dəymiş ziyanı hesablayıb. Gec-tez ədalət yerini tapacaq və Ermənistan törətdiyi cinayətlərə görə cavab verəcəkdir. Əks halda, bu cəzasızlıq gələcəkdə digər ölkələr üçün də təhlükəli nümunə yarada bilər. Azərbaycan yalnız öz torpaqlarında sülh və sabitlik yaratmaq üçün çalışır. Beynəlxalq ictimaiyyət bu haqlı mübarizədə ölkəmizi dəstəkləməli, Ermənistanın törətdiyi cinayətlərə göz yummamalıdır. Ermənistana təzyiqlərin artırılması və dəymiş ziyana görə təzminat ödənilməsi təkcə Azərbaycanın deyil, bütövlükdə regionun təhlükəsizliyinin təmin olunması üçün mühüm addım olacaqdır".
Xumar Əhmədova
15:45 25.02.2025
Oxunuş sayı: 11571
