Köçəryan: "Ermənistan Rusiyanı satdı"
"Ermənistan həlledici anda Rusiyanı atıb, düşmənin düşərgəsinə keçdi".
Crossmedia.az xəbər verir ki, bunu Ermənistanın keçmiş prezidenti, hərbi cinayətkar Robert Köçəryan deyib.
"Rusiya Ukraynada uğursuzluğa düçar olduğu dövrdə Ermənistan hakimiyyəti onun məğlub olduğunu və dağılmaq üzrə olduğunu düşündü və “sonuncu vaqona minməyin" tam zamanı olduğunu hesab etdi. Lakin bu qərarla Rusiyanın vasitəçilik mandatı sıfıra endirildi. Qarabağın təslim edilməsi iki mərhələdə baş verdi. Birinci – 2018-2020-ci illərdə, müharibəyə qədər. İkinci isə 2020-ci ildən 2023-cü ilin sentyabrına qədər. Baş nazir Nikol Paşinyan 2019-cu ildə çox maraqlı və məqbul bir təklifi görməzdən gəldi və əslində, danışıqlara sıfır nöqtədən başlayacağını bildirdi.
Bu isə o demək idi ki, o, həmsədrləri görməzdən gəldi və istədiyi kimi danışıqlar aparacağını elan etdi", - siyasətçi bildirib.
Onun fikrincə, əslində, danışıqlar prosesi çıxılmaz vəziyyətə düşdü: "Sonra isə Paşinyandedi ki, Qarabağ Ermənistandır və nöqtə. Əgər Qarabağ Ermənistandırsa, onda ümumiyyətlə, nəyin müzakirəsi aparıla bilər? Əslində, bu, müharibəyə çağırış idi. Bu yanaşma qaçılmaz olaraq müharibəyə gətirib çıxardı. ATƏT-in Minsk Qrupunun həmsədrlərinin təklifini qəbul etmək və danışıqları davam etdirmək üçün gözəl imkanlar var idi. Hər halda, müharibədən qaçmaq üçün əla imkan mövcud idi. Bunu başa düşməyə çalışaq. Mənim fikrimcə, bunun əsas səbəbi təkəbbür, addımlarını azı iki-üç gediş irəli hesablaya bilməmək və avantürizmdir. Başqa izahı yoxdur”.
Köçəryan düşünür ki, ikinci böyük səhv Qarabağda baş verib: "Bu, Qarabağın təslim edilməsinin ikinci mərhələsi idi, Praqadakı bəyanatla başladı. Həmin bəyanatla Ermənistan Qarabağı Azərbaycanın tərkib hissəsi kimi tanıdı. Bu, Qarabağın taleyi ilə bağlı bir hökm idi.
Xatırladım ki, bu, Rusiyanın Ukraynadakı uğursuzluqlar yaşadığı dövrdə baş verdi. Lakin bu qərarla Rusiyanın vasitəçilik mandatı sıfıra endirildi. Rusiya 9 noyabr bəyanatının vasitəçisi idi və Qarabağ məsələsində Ermənistan və Azərbaycan arasında vasitəçilik edirdi. Əgər elan edilirsə ki, Qarabağ Azərbaycanın tərkib hissəsidir, bu halda vasitəçilik ləğv olunur. Paşinyan düşündü ki, o, bir kənara çəkilə və geosiyasi oyunlara başlaya bilər. Əgər kimsə Rusiyanın görməzdən gəlinə biləcək ölkə olduğunu düşünürsə, o, dərindən yanılır. Bu, belə ola bilməz. Ölkəmizdə bir çoxu Rusiyanın niyə öhdəliklərini yerinə yetirmədiyi məsələsinə görə inciyib. Bütün bunlara Rusiyanın gözü ilə baxaq. Bu bucaqdan tam başqa bir mənzərə görünür. Və görünən budur: Qarabağda baş verənləri yalnız güc tətbiq edərək dayandıra bilərdin, başqa cür mümkün deyildi. Güc tətbiqi kimin naminə? Həlledici anda səni açıq-aşkar tərk edən, düşmən düşərgəsinə keçən Ermənistan naminəmi? Sizdən kimsə onu satmış bir dostu üçün döyüşə girərmi? Zənnimcə, yox. Biz hazırda sürətlə dəyişən bir dünya ilə üz-üzəyik. Heç kim dəqiq deyə bilməz ki, nə baş verəcək, lakin təxminən istiqamət bəllidir".
Müxalifət lideri düşünür ki, belə bir prosesdə danışıqlarda geridönməz itkilərə səbəb olacaq addımlar atmaq axmaqlıqdır: " Minsk Qrupunu istənilən qiymətə qoruyub saxlamaq lazımdır. Əgər indi ATƏT-in Minsk Qrupu buraxılsa, belə yeni bir beynəlxalq formatın formalaşdırılması son dərəcə çətin olacaq. Bu gün Minsk Qrupu nəyə mane olur? O var, mövcuddur – bu, bir danışıqlar formatıdır, qoy, elə qalsın. Əgər başqa işlək bir format yaradılarsa, onda yalnız ondan sonra buraxın".
Kənan Novruzov
13:48 17.02.2025
Oxunuş sayı: 3479
