TDT Türk ölkələrinə çağırış edib
Bu gün Türk İnvestisiya Fondu və Türk Ticarət və Sənaye Palataları Birliyi (TCCI) və Türk İnvestisiya Fondu arasında Anlaşma Memorandumu imzalanacaq.
Crossmedia.az xəbər verir ki, bunu Türk Dövlətləri Təşkilatının (TDT) Baş katibi Kubanıçbek Ömüraliyev Bakıda keçirilən "Türk İnvestisiya Fondu və Türk Ticarət və Sənaye Palataları Birliyi (TCCI): Biznes Liderləri üçün Məlumatlandırma Görüşü və B2B" tədbirində bildirib.
"Bu sənəd, əsas iqtisadi təşkilatlarımız arasında tərəfdaşlığı institutlaşdıracaq və Türk dünyasında investisiyaları sürətləndirəcək. Türk İnvestisiya Fondunun aktivləşməsi kiçik və orta biznesə dəstək verəcək, əsas infrastruktur və iqtisadi layihələri maliyyələşdirəcək, həmçinin ticarət və investisiya imkanlarını genişləndirəcək", - o qeyd edib.
K. Ömüraliyev əlavə edib ki, fond sənaye, logistika, enerji səmərəliliyi, informasiya-kommunikasiya texnologiyaları və yaşıl iqtisadiyyat sahələrində innovativ layihələrə maliyyə dəstəyi verəcək.
O, Türk dünyasının iş adamlarını bölgədə həyata keçiriləcək layihələrə investisiya qoymağa çağırıb: "Türk Dövlətləri Təşkilatı üzvləri arasında ticarətin həcmi hazırda ümumi ixracın cəmi 7 %-ni təşkil edir və bu göstəricinin artırılması üçün daha çox investisiya cəlb edilməlidir".
TDT-nın Baş katibi xatırladıb ki, türk dünyası 107 milyon nəfər əhalisi və 4,5 milyon kvadrat kilometr ərazisi ilə geniş ticarət və investisiya imkanları yaradır.
"Türk dövlətlərinin ümumi ÜDM-i 4,3 trilyon ABŞ dollardan çoxdur və region dünya üzrə üçüncü ən böyük enerji təminatçısıdır", - K. Ömüraliyev bildirib.
O qeyd edib ki, Orta Dəhliz Şərq və Qərb arasında əsas ticarət marşrutu kimi strateji əhəmiyyət daşıyır: "Bu dəhliz, Şimal Dəhlizindən 2 000 kilometr daha qısadır və yükləri Çindən Avropaya dəniz nəqliyyatına nisbətən üç dəfə tez çatdırır".
K. Ömüraliyev Çin-Qırğızıstan-Özbəkistan Dəmir Yolu layihəsinin Orta Şərq və Avropa bazarlarına məsafəni 900 kilometr qısaldacağını və illik yükdaşıma qabiliyyətini 12-15 milyon tona çatdıracağını vurğulayıb.
Onun sözlərinə görə, TDT-nın 11-ci Zirvə Toplantısında Rəqəmsal İqtisadiyyat Tərəfdaşlığı Sazişi (DEPA) imzalanıb və hazırda ratifikasiya prosesindədir: "Bu saziş, TDT üzvləri arasında rəqəmsal əməliyyatlara etimadı artıracaq. Xidmətlər və investisiyalar sahəsində azad ticarət sazişinin yekunlaşdırılması da əsas prioritetlərdəndir. Bu addım üzv ölkələr arasında ticarət dövriyyəsini və investisiya imkanlarını artıracaq".
K. Ömüraliyev qeyd edib ki, Türk dövlətlərinin mərkəzi banklar və milli banklar Şurasının yaradılması barədə Memorandum imzalaması maliyyə əməkdaşlığının genişlənməsinə xidmət edəcək: "Türkiyə Yaşıl Maliyyə Şurası Memorandumunun imzalanması isə "yaşıl maliyyə" və dayanıqlı investisiyalar üçün mühüm addımdır".
O, bu il keçiriləcək əsas iqtisadi tədbirlərə toxunaraq, Daşkənddə Türk İnvestisiya Forumunun, Qazaxıstanın Türkistan şəhərində Turan Sakit Okean İqtisadi Zonasının açılışının, eləcə də Mərkəzi Banklar Şurasının və Yaşıl Maliyyə Şurasının ilk iclaslarının keçiriləcəyini bildirib.
12:26 14.02.2025
Oxunuş sayı: 7269
