"Azərbaycan və Somali arasında əlaqələr daha da güclənəcək"- RƏY
Somali Prezidenti Hasan Şeyx Mahmud Azərhaycanda səfərdədir. O, Azərbaycan Prezidenti İlham Əliyevlə görüşüb. Tərəflər birgə mətbuat konfransında ikitərəfli əlaqələrlə bağlı mühüm mesajlar veriblər. Bu səfər və görüş Somali ilə Azərbaycan arasında əlaqələrin inkişaf edəcəyinə dair ehtimalları gücləndirir.
Səfər barədə Milli Məclisin deputatı Məlahət İbrahimqızı Crossmedia.az-a açıqlama verib: "Bu səfər ilk gündən çox yüksək səviyyədə və zəngin proqramla həyata keçirilir. Məlum olduğu kimi, Somali İslam Konfransı Təşkilatının üzvüdür. Həm də Azərbaycanla bir sıra beynəlxalq təşkilatlarda ikitərəfli olaraq hər zaman bir-birini dəstəkləyiblər. Somali Azərbaycan üçün tam dost bir dövlətdir. Bu iki dövlətin prezidentlərinin geniş təkbətək görüşləri olub və bu görüşlərdə bəyanatla çıxış ediblər. Görüşdə strateji istiqamətlər üzrə əməkdaşlığın təməli qoyulub və möhtərəm Prezidentimiz İlham Əliyev öz çıxışında da deyir ki, bu səfərdən öncə Azərbaycanın böyük nümayəndə heyəti Somalidə olub. Biz beynəlxalq təşkilatlarda həmişə bir-birimizi dəstəkləmişik. Somali hələ inkişaf etməkdə olan ölkələrdən biridir. Daxili problemlərə görə orada uzun illər vətəndaş müharibəsi olub. Qardaş Türkiyənin də Somaliyə böyük dəstəyi olub. Türkiyənin böyük dəstəyinə və digər İslam ölkələrinə, eləcə də Azərbaycan Somaliyə vaxtilə ağır günlərdə humanitar yardımlar göstərib. Bu yardımlar çərçivəsində və artıq aclıqdan uşaqlar ölmür, vətəndaş müharibəsi də tamamilə dayanıb və burada böyük qardaş Türkiyənin çox böyük rolu olub".
Parlamentari qeyd edib ki, imperalist ölkələr xüsusilə Fransa Somalinin resurslarını istismar edib: "Artıq ilkin münasibətlər düzəlib. Bu gün də gələcəkdə yaxşı inkişaf etmiş bir Somali qurmaq üçün bazar quruluşları yaradılır. Bu nöqteyi-nəzərdən də Türkiyədən sonra Azərbaycan kimi orta mədəniyyət dəyərlərinə malik bir ölkə ilə əməkdaşlıq çox əhəmiyyətlidir. Eyni zamanda, Azərbaycanın Qoşulmamam Hərəkatında böyük nüfuzu var və bu çərçivədə Prezidentin İslam Konfransı Təşkilatında İslam həmrəyliyinə böyük töhfə verən ölkə olduğunu qeyd etmək vacibdir.
O, qeyd edib ki, Somalidə iqtisadi vəziyyət hələ də o qədər yaxşı deyil: "Amma Prezidentimiz bunu vurğulayır ki, Azərbaycan müxtəlif sahələrdə, xüsusən də liman və infrastruktur sahələrində sərmayə qoyuluşu edə bilər. Müdafiə sənayesi sahəsində də böyük layihələrin həyata keçirilməsi gözlənilir. Azərbaycan artıq müdafiə sənayesində xeyli uğurlara imza atıb və istehsal etdiyi məhsulları digər ölkələrə ixrac edir. Bu nöqteyi-nəzərdən, Somali üçün də Azərbaycan müəssisələrinin iştirakı çox önəmlidir. Somali və Azərbaycan arasında münasibətlər daha da möhkəmlənəcək. Somali coğrafi mövqeyinə görə, Afrikanın ən önəmli coğrafiyalarından birində yerləşir. Bu səbəbdən imperalist güclər bu bölgəyə həmişə maraq göstəriblər. Fransa artıq Afrika ölkələrindəki təsirini itirir və Azərbaycan ilə Türkiyə bu ədalətin bərpasında mühüm rol oynayacaq".
Xumar Əhmədova
17:27 13.02.2025
Oxunuş sayı: 7345
