Bakı və Pekin separatizmin dəstəklənməsi tendensiyalarına qarşıdır - vahid mövqe nümayiş etdirilir
Azərbaycan-Çin münasibətləri son illərdə keyfiyyətcə yeni mərhələyə yüksələrək strateji tərəfdaşlıq səviyyəsinə çatıb. Prezident İlham Əliyevin müsahibəsində vurğuladığı kimi, strateji tərəfdaşlıq yüksək səviyyəli qarşılıqlı etimada, genişmiqyaslı əməkdaşlığa və birgə inkişaf perspektivlərinə əsaslanır. Çin və Azərbaycan arasında siyasi, iqtisadi və nəqliyyat-logistika sahələrində güclənən əlaqələr hər iki ölkənin beynəlxalq nüfuzunun artmasına töhfə verir. Xüsusilə, Azərbaycanın Şərqlə Qərb, Şimal ilə Cənub arasında yerləşən geostrateji mövqeyi və onun tranzit imkanları Çin tərəfindən yüksək qiymətləndirilir.
Prezident İlham Əliyev Çin KİV-inə müsahibəsində bu məsələlər barədə geniş danışıb.
Milli Məclisin deputatı, siyasi elmlər doktoru Rizvan Nəbiyev Prezident İlham Əliyevin müsahibəsi ilə bağlı fikirlərini Crossmedia.az-la bölüşüb: "Azərbaycan və Çin arasında ikitərəfli və çoxtərəfli münasibətlərin müsbət dinamikada inkişafına təsir edən amillər çoxdur. Bəzi məqamları vurğulamaq istərdim. İlk olaraq qeyd etməliyəm ki, Azərbaycan və Çin arasında münasibətlər möhkəm siyasi fundament və beynəlxalq hüququn hamılıqla qəbul edilmiş prinsiplərinə hörmətə əsaslanır. Rəsmi Bakı və Pekin qlobal arenada separatizmin dəstəklənməsi və ikili standartlara əsaslanan siyasətin aparılması tendensiyalarına qarşı çıxırlar və bu məsələdə vahid mövqe nümayiş etdirirlər. Azərbaycan “Vahid Çin” siyasətini dəstəkləyir və ölkəmiz Tayvanın müstəqilliyini tanımır. Bu o deməkdir ki, Çin Xalq Respublikası hökuməti bütün Çini təmsil edən yeganə qanuni hökumətdir, Tayvan isə Çin ərazisinin ayrılmaz hissəsidir. Çin də Azərbaycanın suverenliyi və ərazi bütövlüyünü dəstəkləyir. 2024-cü ildə Azərbaycan və Çin münasibətlərini keyfiyyətcə yeni mərhələyə, rəsmi olaraq strateji tərəfdaşlıq səviyyəsinə qaldırdılar. Prezident İlham Əliyevin sözləri ilə ifadə desək, “Strateji tərəfdaşlıq çox yüksək səviyyəli qarşılıqlı etimad, əməkdaşlıq deməkdir və müxtəlif beynəlxalq təşkilatlara qoşulma məsələsi daxil olmaqla Çin ilə tərəfdaşlığımızın genişləndirilməsini arzulayırıq”.
Deputat beynəlxalq təşkilatlar çərçivəsində Azərbaycan-Çin münasibətlərindən danışıb: "Beynəlxalq siyasətdə multilaterializmi dəstəkləyən Azərbaycanın Çinlə xarici siyasət sahəsində əməkdaşlığının çoxtərəfli formatda da inkişafı üçün imkanlar mövcuddur. Beynəlxalq təşkilatlar çərçivəsində səmərəli əməkdaşlıq çoxtərəfli müstəvidə münasibətlərin müsbət dinamikasından xəbər verir. Belə ki, Çinin aparıcı qüvvələrdən olduğu Şanxay Əməkdaşlıq Təşkilatının və BRICS-in bütün üzv dövlətlərinin Azərbaycanla çox yaxşı və dost münasibətləri var. Azərbaycan Şanxay Əməkdaşlıq Təşkilatında dialoq üzrə tərəfdaşdır. Şaxələnmiş xarici siyasət istiqaməti həyata keçirən Azərbaycanın COP29 çərçivəsində Qlobal Cənubla Qlobal Şimal arasında daha möhkəm körpülər qurmaq təcrübəsi də beynəlxalq birlik tərəfindən dəyərləndirilir. Prezident İlham Əliyevin sözləri ilə desək “Azərbaycanın təkcə Mərkəzi Asiya, Xəzər və Cənubi Qafqazda deyil, daha geniş coğrafiyada regional sabitliyə, regional sülhə verdiyi töhfə artıq qlobal, beynəlxalq aktorlar tərəfindən yüksək qiymətləndirilir.”
Deputat, Prezident İlham Əliyevin müsahibəsində yer alan Azərbaycanın geosiyasi əhəmiyyəti haqqında danışıb: "Şimal ilə Cənubun, Şərq ilə Qərbin kəşisməsində qərarlaşan Azərbaycanın malik olduğu coğrafi mövqenin üstünlükləri Çin tərəfindən təqdir edilir. Qafqaz-Xəzər regionunda önəmli ölkə olan Azərbaycan geosiyasi mövqe və bundan qaynaqlanan nəqliyyat və loqistika üstünlüyünə malikdir. Azərbaycan qədim "İpək yolu" layihəsinin tərkib hissəsi olmaqla, Çinin 2013-cü ildə elan etdiyi müasir “Bir kəmər, bir yol” təşəbbüsünün reallaşmasına öz resursları hesabına töhfə verir. Bakı Beynəlxalq Dəniz Ticarəti Limanı və Bakı-Tbilisi-Qars dəmiryolu bu istiqamətdə vacib seqmentlərdir. Çindən başlayan və Avropaya qədər uzanan layihənin mahiyyəti ondan ibarətdir ki, Çindən ixrac edilən mallar zamana qənaət və əlverişli tranzit rüsumları ilə Avropa bazarına çatsın. Əlbəttə ki, bu faktor Azərbaycanın həm Çin-Avropa ticarət əlaqələrində sabit tranzit ölkə kimi rolunun artmasına xidmət edir, həm də həyata keçirilən bu cür perspektivli layihələr beynəlxalq əməkdaşlıq yolunda geniş imkanlar açır".
Ayhan Ağarzayev
14:43 13.02.2025
Oxunuş sayı: 8108
