Əfv olacaqmı? - Komissiyanın iclası keçirildi
Bu gün Prezident yanında Əfv Məsələləri Komissiyasının iclası keçirilib. Komissiya üzvlərinin məluumatına görə iclasda 100-dən çox müraciətə baxılıb.
Bəs kimlər əfvə düşəcək? Əfvetmə zamanı nəzərə alınan əsas nüanslar hansılardır?
Mövzu ilə bağlı Prezident yanında Əfv Məsələləri Komissiyasının üzvü Əliməmməd Nuriyev Crossmedia.az-a açıqlama verib:
“Əfv Komissiyası, daxil olan müraciətlərə əfvetmə haqqında əsasnamənin tələblərinə uyğun olaraq baxır və ordan bəzi məhbusları seçərək prezidentə təqdim edir. Bu zaman əlbəttə ki, bir çox kriteriyalar nəzərə alınır. Bu kriteriyalar nələrdir? Şəxs hansı cinayətə görə həbs edilib, şəxsin ailə vəziyyəti, səhhəti, yaşı, dəymiş zərərin məhkum tərəfindən ödənib odənilmədiyi, zərərçəkmişin bu məsələdə mövqeyi və eyni zamanda məhbusun islaha meyilli olub-olmaması.
Bunlar hər biri nəzərə alınan əsas nüanslardır. Bu məsələdə cəmiyyətin də fikirləri önəmlidir. Nəzərə alınmalıdır ki, cəmiyyət həmin şəxsin azadlığa çıxmasından məmnun olacaqmı? Əfvetmə zamanı bu tarazlığı qorumaq çox vacibdir. Çünki əfv cəmiyyətlə dövlət arasında bir dialoq formasıdır. Burda əfvetmə ilə bağlı dövlətin üzərinə böyük məsuliyyət düşür. Elə şəxslər var ki, onların əfv edilməsi ölkədə kriminal vəziyyət yarada bilər”.
Ayhan Ağarzayev
19:47 12.02.2025
Oxunuş sayı: 7361
