“Azərbaycan öz milli maraqlarını qoruyur və inkişaf etdirir”
Azərbaycanın strateji mövqeyini möhkəmləndirən və regionda etibarlı tərəfdaş kimi tanınmasını təmin edən əsas amillər güclü iqtisadiyyat, balanslı xarici siyasət və dayanıqlı infrastruktur layihələridir. Prezident İlham Əliyevin rəhbərliyi altında ölkə həm daxili sabitliyini qoruyub saxlamış, həm də beynəlxalq arenada mühüm diplomatik və iqtisadi uğurlara imza atmışdır. Enerji və nəqliyyat sektorunda həyata keçirilən genişmiqyaslı layihələr, Cənub Qaz Dəhlizi və Orta Dəhliz kimi təşəbbüslər Azərbaycanın strateji əhəmiyyətini artırmış, onu regionda etibarlı tərəfdaşa çevirmişdir. Eyni zamanda, balanslı xarici siyasət ölkəmizin böyük güclərlə qarşılıqlı maraqlara əsaslanan əlaqələr qurmasına imkan vermişdir. Azərbaycanın bu mövqeyini qoruyub saxlamasında Prezident İlham Əliyevin uzaqgörən siyasəti və liderlik keyfiyyətləri mühüm rol oynayır.
Milli Məclisin deputatı Pərvanə Vəliyeva Prezident İlham Əliyevin Davos səfəri, burada Çin televiziyasına verdiyi müsahibə çərçivəsində toxunduğu məsələlərlə bağlı fikirlərini Crossmedia.az-a bildirib: “Prezident İlham Əliyev müsahibədə Azərbaycanın çoxşaxəli və balanslaşdırılmış xarici siyasətini vurğulayan əsas məqamlara toxunur. O, xüsusilə Azərbaycanın Çin, Avropa İttifaqının 10 üzv ölkəsi, Türkiyə, Özbəkistan kimi ölkələrlə strateji tərəfdaşlıq və müttəfiqlik bəyannamələrini imzaladığını qeyd edir. Bu, Azərbaycanın beynəlxalq arenada özünü güclü və nüfuzlu bir oyunçu olaraq mövqeləndirdiyini göstərir. Prezidentin vurğuladığı əsas məsələlərdən biri, Azərbaycanın yalnız Mərkəzi Asiya, Xəzər və Cənubi Qafqazda deyil, həm də geniş coğrafiyada regional sabitliyə və sülhə verdiyi töhfələrdir. Bu, ölkənin daxili və xarici siyasətində birlik və sabitlik yaratmaqla mümkün olmuşdur. Azərbaycanın şaxələnmiş xarici siyasətinin əsas məqsədi, yalnız öz milli maraqlarını qorumaq deyil, beynəlxalq müstəvidə də daha geniş əlaqələr qurmaqdır”.
Deputat Azərbaycanın Çinlə olan iqtisadi münasibətlərindən danışıb: “Azərbaycanın geopolitik və iqtisadi mövqeyi, xüsusən Orta Dəhliz və yaşıl enerji sahələrində əldə etdiyi irəliləyişlər bu strateji yanaşmanı dəstəkləyir. Ölkə, dünya iqtisadiyyatında mühüm oyunçu olan Çinlə əməkdaşlıq etməklə, həm regional, həm də qlobal enerji və ticarət şəbəkələrinə mühüm töhfələr verir. Bu xarici siyasət yanaşması, Azərbaycanın həm iqtisadi, həm də siyasi cəhətdən müstəqil və etibarlı tərəfdaş kimi tanınmasını təmin edir. Ölkə, heç bir xarici qüvvənin müdaxilə cəhdinə imkan verməyərək öz milli maraqlarını qoruyur və inkişaf etdirir”.
Ayhan Ağarzayev
18:39 12.02.2025
Oxunuş sayı: 11034
