Prezident İlham Əliyevin müsahibəsi beynəlxalq və regional əhəmiyyətli mühüm məsələləri əhatə edir
Prezident İlham Əliyev Davosda Çin televiziyası CGTN-ə müsahibəsində önəmli mesajlar verib. O, Azərbaycanın suverenliyinin tam bərpa olunması, güclü və dayanıqlı iqtisadiyyat qurmaq istiqamətində atılan addımlar, iqlim dəyişikliyi ilə mübarizədə fəal iştirak və beynəlxalq əməkdaşlıq siyasəti barədə ətraflı danışıb. O cümlədən, ABŞ-Azərbaycan münasibətlərinin perspektivlərini və Donald Trampın prezidentliyi dövründə ikitərəfli əlaqələrin hansı istiqamətdə inkişaf edə biləcəyini vurğulayıb. Bu müsahibə Azərbaycanın qlobal miqyasda strateji mövqeyini, iqtisadi və siyasi gücünü nümayiş etdirmək baxımından əhəmiyyətli bir çıxışdır.
Milli Məclisin deputatı Aydın Hüseynov Prezident İlham Əliyevin müsahibəsi ilə bağlı fikirlərini Crossmedia.az-la bölüşüb:
“Prezident İlham Əliyevin Çin Xalq Respublikasının CGTN telekanalına verdiyi müsahibə beynəlxalq və regional əhəmiyyətli bir çox mühüm məsələləri əhatə edib. O, qlobal geosiyasi proseslər fonunda Azərbaycanın iştirak etdiyi yeni nəqliyyat layihələrinin strateji əhəmiyyətini vurğulamaqla yanaşı, Azərbaycan-Çin əlaqələrinin mövcud vəziyyətinə və perspektivlərinə dair dəyərli fikirlərini bölüşüb. Dövlət başçısı xüsusilə 3 iyul 2023-cü ildə Astanada imzalanmış “Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə”ni iki ölkə arasındakı münasibətlərin daha da inkişaf etməsində əhəmiyyətli addım kimi qiymətləndirib”.
Deputat, müsahibədə vurğulanan, Azərbaycanın yer aldığı böyük iqtisadi layihələrdən danışıb: “Azərbaycanın Orta Dəhliz layihəsində oynadığı mühüm rol da Prezident İlham Əliyevin müsahibəsində yer alıb. Azərbaycan bu nəqliyyat marşrutunun ən etibarlı mərkəzlərindən birinə çevrilərək, Şərq-Qərb istiqamətində beynəlxalq daşımaların fasiləsiz və səmərəli həyata keçirilməsinə şərait yaradır. Beynəlxalq ticarət dairələri Azərbaycanın coğrafi mövqeyinin əhəmiyyətini nəzərə alaraq Transxəzər Beynəlxalq Nəqliyyat Marşrutunun inkişafına xüsusi maraq göstərir və bu layihəyə dəstək verir”.
Ayhan Ağarzayev
18:04 12.02.2025
Oxunuş sayı: 5636
