"Rus evi" fəaliyyətini dayandırdı, bundan sonra nə olacaq?- "Oradakı Azərbaycan təşkilatları..."
Bakıda “Rus evi”nin yerləşdiyi bina boşaldılıb. Mərkəzin qapısı üzərindəki lövhə və həm rus, həm də Azərbaycan dilindəki yazılar sökülüb. Həmçinin foyedəki məlumat xarakterli afişa və fotolar da yığışdırılıb.
Məlum olduğu kimi, Bakıdakı "Rus evi"nin fəaliyyəti Azərbaycanla Rusiya arasında münasibətlərdə gərginliyə səbəb olub. Belə ki, "Rus evi"nin əslində casusluq fəaliyyətinə xidmət etməsi ilə bağlı ciddi iddialar var idi. İndi həmin mədəniyyət mərkəzinin bağlanması əslində həm də Azərbaycanın növbəti diplomatik qələbəsi kimi qiymətləndirilə bilərmi?
Bu barədə Crossmedia.az-a danışan Milli Məclisin deputatı Anar İsgəndərov bildirib ki, bu, Azərbaycanın demokratik bir dövlət olduğuna əyani nümunədir: "Bir halda ki, "Rus evi" qeydiyyatdan keçməyib, onun rəsmi sənədləri yoxdur, deməli, fəaliyyəti də mümkün deyil. Ona görə də qeydiyyatdan keçməyən bir təşkilatın Bakıda, həm də şəhərin mərkəzi yerlərinin birində fəaliyyəti qanunauyğun deyildi. Bu mənada da "Rus evi" öz fəaliyyətini dayandırdı".
A. İsgəndərov qeyd edib ki, gələcəkdə bu təşkilat öz fəaliyyətini davam etdirmək istəyirsə o, qanun əsasında fəaliyyət göstərməlidir: "Fəaliyyət o qədər şəffaf olmalıdır ki, Azərbaycan tərəfdən onun fəaliyyəti ilə bağlı heç bir şübhə olmasın. Təbii ki, Rusiyada da diaspor xətti ilə fəaliyyət göstərən Azərbaycan təşkilatları var. Amma bu təşkilatların fəaliyyəti qanunla tənzimlənir".
Fatimə Məmmədova
17:35 12.02.2025
Oxunuş sayı: 5780
