Alimlər bel ağrısı ilə bağlı yayılmış təsəvvürü dəyişib
Bel ağrısının səbəblərindən biri hesab edilən qarın əzələlərinin kiçik olması ilə bağlı geniş yayılmış fikir yeni araşdırmada təsdiqini tapmayıb.
Crossmedia.az xəbər verir ki, Stenford Universitetinin tədqiqatçıları 33,5 mindən çox kompüter tomoqrafiyası görüntüsünü araşdıraraq bu qənaətə gəliblər.
Araşdırma zamanı bel ağrısı diaqnozu olan şəxslərin qarın əzələlərinin orta ölçüsünün belə bir problemi olmayan insanlardan az olmadığı müəyyən edilib.
Bununla belə, bel ağrısı yaşayan şəxslərdə qarın nahiyəsində əzələ toxumasının yağ toxumasına nisbətinin daha aşağı olduğu aşkarlanıb.
Tədqiqatçılar araşdırmada 23 508 nəfərin tibbi görüntülərindən istifadə ediblər. Onlardan 2622 nəfərdə bel ağrısı diaqnozu müəyyən edilib, 2577 nəfər isə müqayisə qrupu kimi seçilib.
Alimlərin fikrincə, bel ağrısının səbəblərini müəyyənləşdirmək üçün yalnız əzələlərin ümumi ölçüsünə deyil, ayrı-ayrı əzələlərin quruluşuna, yerləşməsinə və hərəkət zamanı fəaliyyətinə də diqqət yetirilməlidir.
Araşdırmanın nəticələri “PLOS Digital Health” jurnalında dərc olunub.
03:24 22.11.2026
Oxunuş sayı: 29