Quru meyvə yeyərkən bu səhvə yol verməyin — AÇIQLAMA
Son illər sağlam qidalanmaya marağın artması ilə quru meyvələr də gündəlik qida rasionunda daha çox yer almağa başlayıb. Ərik qurusu, kişmiş, xurma, əncir və digər quru meyvələr tərkibindəki vitaminlər, minerallar, lif və antioksidantlarla orqanizm üçün faydalı qida məhsulları hesab olunur. Lakin bu məhsulların təbii və faydalı olması onların istənilən miqdarda istehlak edilə biləcəyi anlamına gəlmir. Meyvələrin qurudulması zamanı suyun miqdarı azaldığından, tərkibindəki təbii şəkər və enerji dəyəri daha konsentrasiyalı olur. Bu isə xüsusilə şəkərli diabet, insulin müqaviməti və artıq çəki problemi olan şəxslər üçün quru meyvələrin qəbulunda diqqətli olmağı zəruri edir.
Digər tərəfdən, bazarlarda və mağazalarda satışa çıxarılan quru meyvələrin keyfiyyəti, hazırlanma üsulu və tərkibi də hər zaman eyni olmur. Bəzi məhsullara rəngini və görünüşünü qorumaq məqsədilə əlavə maddələr tətbiq edilir, bəzilərində isə şəkər və digər əlavələrdən istifadə olunur. Bu səbəbdən quru meyvə alarkən yalnız görünüşünə deyil, həm də etiket məlumatlarına, saxlanma şəraitinə və məhsulun təbii xüsusiyyətlərinə diqqət yetirmək vacibdir.
Bəs quru meyvələrin faydalı xüsusiyyətlərindən yararlanmaq üçün gündəlik nə qədər istehlak etmək məqsədəuyğundur? Sağlamlıq problemləri olan insanlar bu məhsulları qida rasionuna necə daxil etməlidirlər?
Dietoloq Tutu Zeynalova Crossmedia.az-a açıqlamasında bildirib ki, quru meyvələr təbii qəlyanaltı kimi tanınır:

"Tərkibində lif, kalium, dəmir, maqnezium və antioksidantlar var. Amma qurudulma zamanı meyvənin suyu çıxır, şəkər isə qatılaşır. Ona görə 100 qram quru meyvə təzəsindən qat-qat çox kalori və şəkər verir. Fayda da, zərər də miqdardan və düzgün seçimdən asılıdır.
Sağlam böyüklər üçün gündə təxminən 30 qram, yəni bir ovuc kifayətdir. Bu, 2-3 əncir, 3 ədəd xurma və ya 1 xörək qaşığı kişmiş deməkdir.
Quru meyvəni ayrıca yemək əvəzinə qoz-fındıq, süzmə və ya qatıqla birlikdə qəbul etmək daha yaxşıdır. Zülal və sağlam yağ qan şəkərinin sürətlə qalxmasının qarşısını alır.
Şəkərli diabet, insulin müqaviməti və artıq çəki olanlar quru meyvəni tam qadağan etməli deyillər, amma ehtiyatlı olmalıdırlar:
• Gündəlik miqdar 15-20 qramı keçməsin (1-2 xurma və ya bir neçə ərik qurusu).
• Quru meyvəni boş qarına və tək yeməyin. Qoz, badam və ya qatıqla birlikdə qəbul edin.
• Qan şəkərini daha yavaş qaldıran quru ərik, gavalı, alma və armud dilimlərinə üstünlük verin. Xurma, kişmiş, quru banan və ananas şəkəri daha sürətlə qaldırır.
• Dərman və ya insulin qəbul edirsinizsə, quru meyvədən 2 saat sonra qan şəkərini yoxlayıb öz orqanizminizin reaksiyasını görün.
• Artıq çəkiniz varsa, quru meyvəni gecə yeməyinə çevirməyin. Qabdan əllə yedikdə normanı aşmaq çox asandır.
Diabeti olanlar miqdarı mütləq həkimlə razılaşdırmalıdırlar.
Quru meyvə təbii şirniyyatdır, amma yenə də şirniyyatdır. Gündə bir ovuc kifayətdir. Tərkibi oxuyun, parlaq rənglərə aldanmayın. Şəkərli diabet, insulin müqaviməti və ya artıq çəki problemi olanlar isə miqdarı daha da azaldıb həkimlə məsləhətləşməlidirlər".
Məhəbbət Tərlanoğlu
19:42 21.11.2026
Oxunuş sayı: 46