Cənubi Koreyada imtahanlara süni intellektlə köçürməyə qarşı sərt nəzarət tətbiq edilib
Cənubi Koreyada universitetlərə qəbul imtahanları ərəfəsində süni intellekt vasitəsilə köçürmə hallarının qarşısını almaq üçün təhlükəsizlik tədbirləri gücləndirilib.
Crossmedia.az xəbər verir ki, “Associated Press” agentliyi bu barədə məlumat yayıb.
Ölkədə 500 mindən çox abituriyentin iştirak etdiyi ümummilli qəbul imtahanı gənclərin gələcək təhsil və karyera imkanlarını müəyyənləşdirən ən mühüm sınaqlardan biri hesab olunur.
Nəzarətin sərtləşdirilməsinə səbəb vergi mühasibləri üçün keçirilən peşə imtahanında yaşanan qalmaqaldır. İmtahanda ən yüksək nəticəni göstərən 34 yaşlı iştirakçı gizli kamera, smartfon və generativ süni intellekt vasitəsilə sualların cavablarını əldə etdiyini etiraf edib.
Hadisədən sonra hökumət ağıllı eynəklər, gizli kameralar və digər elektron qurğular vasitəsilə köçürmə hallarının qarşısını almaq üçün əlavə tədbirlər görüb.
Ölkə üzrə 1300-dən çox imtahan mərkəzində nəzarət gücləndirilib. Xüsusi təlim keçmiş nəzarətçilərə abituriyentlərin eynəklərini və şübhəli elektron avadanlıqları yoxlamaq tapşırılıb.
Rəsmilər süni intellekt texnologiyalarından istifadə edərək imtahan qaydalarını pozan şəxslərin cinayət məsuliyyətinə cəlb oluna biləcəyi barədə xəbərdarlıq ediblər.
İmtahanın təxirə salınması ilə bağlı çağırışlara baxmayaraq, Cənubi Koreyanın Təhsil Nazirliyi sınağın əvvəlcədən müəyyən edilmiş qrafik üzrə, noyabrın 19-da keçirilməsi qərarını dəyişməyib.
Bununla belə, mütəxəssislər tətbiq olunan tədbirlərin effektivliyinə şübhə ilə yanaşırlar. Onların fikrincə, ictimai Wi-Fi şəbəkələrinin məhdudlaşdırılması kimi üsullar texnologiyadan istifadə edən bütün köçürmə hallarının qarşısını almaq üçün kifayət etməyə bilər.
Ekspertlər Cənubi Koreyanın yüksək rəqabətli təhsil sistemində başqa bir problemə də diqqət çəkirlər. Belə ki, bahalı özəl hazırlıq kurslarından istifadə imkanlarının fərqli olması abituriyentlər arasında bərabərsizliyi daha da artırır.
02:00 22.11.2026
Oxunuş sayı: 22