Gündəm
Deputat: ICESCO ilə tərəfdaşlıq ölkəmizin beynəlxalq nüfuzunun bariz göstəricisidir!
Heydər Əliyev Fondunun vitse-prezidenti Leyla Əliyevanın İslam Dünyası Təhsil, Elm və Mədəniyyət Təşkilatının (ICESCO) Baş direktoru Səlim bin Məhəmməd əl-Malik ilə keçirdiyi mühüm görüş Bakı ilə islam dünyası arasında tərəfdaşlığın yeni inkişaf mərhələsinə qədəm qoyduğunu nümayiş etdirib. Heydər Əliyev Fondunun təkcə Azərbaycan daxilində deyil, beynəlxalq miqyasda – islam dünyasında və digər ölkələrdə təhsil, mədəniyyət və sosial dəstək sahələrində həyata keçirdiyi miqyaslı humanitar layihələrə görə nüfuzlu “Həmdan-ICESCO” mükafatına layiq görülməsi Fondun qlobal humanitar missiyasının ali etirafıdır. Qarabağ və Şərqi Zəngəzurda işğal dövründə dağıdılmış tarixi-dini abidələrin və məscidlərin bərpası ilə yanaşı, xaricdə reallaşdırılan layihələr Azərbaycanın mədəni diplomatiyasını dünyada ən öncül mövqelərə çıxarır.
Milli Məclisin deputatı Vüqar Bayramov görüşün geostrateji və mədəni-humanitar əhəmiyyətini, eləcə də Azərbaycanın beynəlxalq nüfuzunun artmasındakı rolu barədə Crossmedia.az-a açıqlama verib:
"Heydər Əliyev Fondunun beynəlxalq təşkilatlarla – UNESCO və ICESCO ilə mədəniyyət, elm, təhsil və informasiya sahələrində genişlənən əməkdaşlığı Azərbaycanın bütövlükdə mədəni irsə, eyni zamanda elm və təhsilə verdiyi xüsusi diqqətin təzahürüdür. Sivilizasiyalararası Dialoq Forumunun hazırlanması və keçirilməsi kontekstində cənab Prezident də çıxışı zamanı xüsusilə qeyd etdi ki, Azərbaycan islam irsini ardıcıl dəstəkləyən və bu istiqamətdə fəaliyyətini qlobal miqyasda genişləndirən aparıcı ölkələrdəndir".
Deputat Fondun həm ölkə daxilində, həm də xaricdə həyata keçirdiyi misilsiz missiyanı diqqətə çatdırıb:
"Heydər Əliyev Fondunun təşəbbüsü ilə Azərbaycanda və eyni zamanda ölkəmizdən kənarda kifayət qədər çoxlu sayda humanitar layihələr həyata keçirilib. O cümlədən Ermənistanın işğalı zamanı tamamilə dağıdılan məscidlərin Qarabağ və Şərqi Zəngəzurda yenidən qurulması və bərpası bu missiyanın əsas tərkib hissəsidir".
Vüqar Bayramov bu əməkdaşlığın Azərbaycanın mədəni diplomatiyasını gücləndirdiyini vurğulayaraq fikrini yekunlaşdırıb:
"Beynəlxalq təşkilatlarla qurulan bu sıx əməkdaşlıq Azərbaycanın beynəlxalq nüfuzunun gücləndirilməsi və mədəni diplomatiyanın daha geniş coğrafiyada yayılması baxımından mühüm strateji əhəmiyyət kəsb edir. Çünki Azərbaycan bu platformalar vasitəsilə öz humanitar fəaliyyətini və mədəni diplomatiyasını dünya miqyasında genişləndirmək imkanına malikdir. Bu, bir daha xəbər verir ki, Azərbaycan yalnız ölkə daxilində deyil, ölkədən kənar humanitar layihələri də fəal dəstəkləyən və qlobal sülhə, dialoqa böyük töhfələr verən dövlətdir".
Zeynəb Həsən
21:30 29.10.2026
Oxunuş sayı: 65
