Sosial media paylaşımına görə gəncə ölüm hökmü verildi
Şri-Lanka vətəndaşı, 24 yaşlı Anojan Sivarasa Səudiyyə Ərəbistanında İslam və Məhəmməd peyğəmbər haqqında sosial şəbəkədə yazdığı şərhə görə ölüm cəzasına məhkum edilib.
Crossmedia.az xəbər verir ki, Anojan Şri-Lankada hindu ziyarəti zamanı baş verən hadisə ilə bağlı sosial şəbəkədə yaranan mübahisə zamanı tamil dilində Məhəmməd peyğəmbəri təhqir edən şərh yazıb. O, paylaşımı qısa müddət sonra silərək video vasitəsilə üzr istəyib. Lakin şərhin ekran görüntüsü çəkilərək onun Səudiyyə Ərəbistanındakı işəgötürəninə və daha sonra ölkənin aidiyyəti orqanlarına göndərilib.
Bundan sonra Anojan iyul ayında saxlanılıb. Onun şəxsi cihazları müsadirə edilib, sosial media hesablarının isə Səudiyyə rəsmiləri tərəfindən silindiyi bildirilir.
Əvvəlcə Əl-Əhsa Cinayət Məhkəməsi Anojanı 5 il müddətinə azadlıqdan məhrumetmə və 3 milyon Səudiyyə rialı (təxminən 800 min ABŞ dolları) məbləğində cəriməyə məhkum edib. Lakin sentyabrın 17-də Səudiyyə prokurorları işin ölkənin kibercinayət qanunvericiliyi əvəzinə şəriət qanunları əsasında araşdırılması üçün apellyasiya müraciəti ediblər.
Apellyasiya məhkəməsi prokurorluğun tələbini təmin edərək Anojanın cəzasını ölüm hökmünə qədər ağırlaşdırıb.
Anojanın ailəsi onun bağışlanması üçün Şri-Lanka hökumətinə müraciət edib. Anası Rasamanickam Yogalakshmi oğlunun bağışlanmasını və ailəsinə qaytarılmasını istəyib.
Şri-Lanka Prezidenti Anura Kumara Dissanayake sentyabrın 21-də Anojanın ailəsi ilə görüşüb və onun əfv olunması üçün diplomatik kanallardan istifadə ediləcəyini bildirib. Şri-Lanka Xarici İşlər Nazirliyi də Anojana yardım göstərmək üçün bütün mümkün tədbirlərin görüldüyünü açıqlayıb.
Bundan əlavə, ölkənin müxtəlif dini icmalarının nümayəndələri Anojanın həyatının xilas edilməsi üçün hökumətə müraciət ediblər. Şri-Lankadan dörd nəfərlik hüquq nümayəndə heyətinin bu həftə Səudiyyə Ərəbistanına gedərək Anojanın yerli vəkilləri ilə görüşəcəyi bildirilib.
Hazırda Anojanın ailəsi ilə əlaqəsinin kəsildiyi qeyd olunur. Səudiyyə Ərəbistanı rəsmiləri hökmün nə vaxt icra ediləcəyinə dair rəsmi tarix açıqlamayıb.
Məlumata görə, insan haqları təşkilatları Səudiyyə Ərəbistanında sosial şəbəkələrdə ifadə olunan fikirlərə görə ağır cəzaların tətbiqi ilə bağlı dəfələrlə narahatlıq bildiriblər.
14:11 06.10.2026
Oxunuş sayı: 43
