Hidayət Heydərov dünya çempionatına qələbə ilə başladı
Azərbaycan cüdoçusu Hidayət Heydərov Bakıda keçirilən dünya çempionatında ilk görüşünü qələbə ilə başa vurub.
Crossmedia.az xəbər verir ki, 73 kq çəki dərəcəsində mübarizə aparan idmançı 1/32 finalda Kosovodan olan Akil Qyakova ilə qarşılaşıb. H.Heydərov rəqibinə qalib gələrək növbəti mərhələyə yüksəlib.
Olimpiya çempionu 1/16 finalda Finlandiya təmsilçisi Valtteri Olinlə üz-üzə gələcək.
Bu gün Azərbaycan millisinin üzvləri Xədicə Qədəşova (57 kq) və Rəşid Məmmədəliyev (73 kq) də tatamiyə çıxacaq.
Qeyd edək ki, dünya çempionatı oktyabrın 11-də başa çatacaq. Yarışın ilk günündə Əhməd Yusifov (60 kq) qızıl medal qazanıb. Bu, Azərbaycan cüdosunda böyüklər arasında dünya çempionatlarında əldə olunan dördüncü qızıl medal, 60 kq çəki dərəcəsində isə ilk dünya çempionluğudur.
11:07 06.10.2026
Oxunuş sayı: 53
