Rusiyada naməlum xəstəlikdən ölüm araşdırılır: Onlarla insan təcrid olunub
Rusiyada vəba və digər yoluxucu xəstəliklərin araşdırılması üzrə ixtisaslaşmış institutun əməkdaşının naməlum xəstəlikdən ölməsindən sonra onlarla şəxsin təcrid olunduğu bildirilir.
Crossmedia.az xəbər verir ki, "CNN" bu barədə Rusiya İstehlakçı Hüquqlarının Müdafiəsi və İnsan Rifahına Nəzarət Federal Xidmətinə (Rospotrebnadzor) istinadən məlumat yayıb.
28 yaşlı qadın laboratoriya texniki İrkutskda yerləşən Sibir Vəba Əleyhinə Tədqiqat İnstitutunda çalışıb. Yerli mediada onun Darya Şipilova olduğu bildirilib.
Rospotrebnadzorun məlumatına görə, laboratoriya əməkdaşı mənşəyi “naməlum” olan pnevmoniya diaqnozu qoyulduqdan sonra vəfat edib. Qurum onun ölümü ilə peşə fəaliyyəti arasında əlaqəni aşağı qiymətləndirib.
Açıqlamada bildirilib ki, xəstədən götürülən nümunələrdə əməkdaşın iş fəaliyyəti ilə əlaqəli hər hansı mikroorqanizm aşkarlanmayıb. Qurum həmçinin bölgədə epidemioloji vəziyyətin sabit olduğunu qeyd edib.
Bununla belə, Rospotrebnadzorun rəhbəri Anna Popova cümə günü İrkutska gedib. Regionun qubernatoru İqor Kobzevin sözlərinə görə, Popovanın səfəri regional epidemiya əleyhinə komissiyanın fövqəladə iclasında iştirak məqsədi daşıyıb.
ABŞ dövlət katibi Marko Rubio isə vəziyyətin yaxından izlənildiyini bildirib. O, hazırda təşvişə səbəb olmadığını, lakin vəziyyətə diqqətlə nəzarət edilməsinin vacib olduğunu deyib.
04:50 06.10.2026
Oxunuş sayı: 49
