Parking mübahisəsi 12 yaşlı qızın ölümü ilə nəticələndi
ABŞ-ın Baltimor şəhərində iki kişinin park yeri üstündə mübahisəsi zamanı açılan atəş nəticəsində hadisə ilə əlaqəsi olmayan 12 yaşlı qız ölüb.
Crossmedia.az xəbər verir ki, “Anadolu Ajansı” bu barədə məlumat yayıb.
Baltimor Polis Komissarı Riçard Uorli bildirib ki, iki kişi park yeri ilə bağlı mübahisə edib və daha sonra bir-birinə atəş açıb.
Atışma uşaqların Amerika futbolu oynadığı parkda baş verib. Hadisə zamanı futbol matçına baxdığı ehtimal edilən 12 yaşlı qız güllə yarası alaraq həyatını itirib.
Polis hadisə yerində qızla yanaşı, güllə yarası almış bir qadın da aşkarlayıb. Hadisə ilə əlaqəli olduğu ehtimal edilən iki kişinin də daha sonra xəstəxanalara müraciət etdiyi bildirilib.
Polis ən azı iki şübhəlinin axtarıldığını, hələlik heç kimin saxlanılmadığını açıqlayıb. Yaralanan digər üç nəfərin vəziyyətinin həyati təhlükə yaratmadığı qeyd olunub.
Baltimor meri Brendon Skott iki yetkin şəxsin mübahisəsi nəticəsində 12 yaşlı uşağın həyatını itirməsinə görə narazılığını bildirib.
Hadisə ilə bağlı araşdırma davam edir. Hüquq-mühafizə orqanları şahidlərdən məlumat vermələrini xahiş edib.
13:06 05.10.2026
Oxunuş sayı: 48
