Xarici xəbərlər

Məşhur şotlandiyalı yazıçı Peter Mey vəfat edib

Şotlandiyanın tanınmış televiziya ssenaristlərindən və kriminal roman müəlliflərindən biri Peter Mey 74 yaşında vəfat edib.

Crossmedia.az xəbər verir ki, "BBC" bu barədə məlumat yayıb.

Yazıçının ölümünü həyat yoldaşı və həmkarı, müəllif Janis Helli açıqlayıb. O, həyat yoldaşının vəfatından sonra hisslərini ifadə etməyə söz tapmadığını bildirib.

Peter Mey cümə günü uzun illər yaşadığı Fransanın cənubundakı evində dünyasını dəyişib. Yazıçı yaradıcılığına görə bir sıra mükafatlara namizəd göstərilib.

Onun kitabları dünya üzrə təxminən 15 milyon nüsxə satılıb. Meyin sonuncu əsəri olacağını açıqladığı “Island of the Dead” romanının 2027-ci ilin yanvarında nəşr olunması planlaşdırılır.

Yazıçının yaxın dostu və naşiri Con Rayli bildirib ki, Mey təqaüdə çıxacağını elan etdikdən sonra həyat yoldaşı ilə daha çox vaxt keçirməyi planlaşdırırdı. Lakin yazıçı sonuncu bir roman üzərində işləmək üçün özündə hələ də güc tapıb.

Raylinin sözlərinə görə, Mey son romanının nəşri ilə eyni vaxtda Şotlandiya və Luis adasında vida turuna hazırlaşırdı.

Naşir qeyd edib ki, Mey təkcə kriminal janrın ən yaxşı müəlliflərindən biri deyil, həm də oxucuları və birlikdə çalışdığı insanlar arasında böyük rəğbət qazanan yazıçı olub. Rayli onun mehribanlığı, səxavəti, həyata və dünyaya bağlılığı ilə yanaşı, sədaqəti və insanlarla ünsiyyəti sayəsində həm sevilən, həm də hörmət edilən şəxs olduğunu vurğulayıb.

Mövzular:

Şotlandiya Peter Mey Fransanın cənubu Con Rayli Janis Helli

🖨 Çap et

02:18 30.09.2026

Oxunuş sayı: 41