Hindistan ordusu yeni tanklarla gücləndirilir
Hindistan hökuməti yerli istehsal olan “Zorawar” yüngül tanklarının ilk məhdud sayda partiyasının ordunun silahlanmasına daha tez daxil edilməsi üçün variantlar üzərində işləyir.
Crossmedia.az xəbər verir ki, “NDTV” bu barədə Hindistanın müdafiə naziri R.K. Sinqhə istinadən məlumat yayıb.
“Zorawar” yüngül tankı Hindistan Müdafiə Araşdırmaları və İnkişaf Təşkilatının Döyüş Maşınlarının Tədqiqat və İnkişaf Mərkəzi (CVRDE) və “Larsen & Toubro” şirkəti tərəfindən birgə hazırlanıb. “Larsen & Toubro” sistemlərin inteqrasiyasını həyata keçirib, mikro, kiçik və orta müəssisələr isə tank üçün müxtəlif alt sistemlər təchiz edib.
Layihə 2022-ci ilin martında təsdiqlənib, tankın təqdimatı isə 2024-cü il iyulun 6-da şirkətin Hazira zavodunda keçirilib. Nəşr layihənin hazırlanma müddətinin Hindistanda iri silah sistemlərinin ənənəvi inkişaf tempi ilə müqayisədə qısa olduğunu qeyd edib.
Müdafiə naziri bildirib ki, tankın ilkin istifadəyə qəbulundan əvvəl əlavə tələblər irəli sürülüb və bu da prosesin uzanmasına səbəb olub. Onun sözlərinə görə, əvvəlcə müəyyən tələblər əsasında hazırlanan sistemə sonradan əlavə imkanların daxil edilməsi silah sistemlərinin orduda istifadəyə verilməsini gecikdirə bilər.
Hökumətin “Zorawar” tanklarını mərhələli şəkildə silahlanmaya daxil etmək niyyətində olduğu bildirilir. İlk sifariş 59 tankı əhatə edir. Bu say Hindistan ordusunun təxminən 354 yüngül tankla bağlı ehtiyacının beşdə birindən də azdır. İlk mərhələdə isə təxminən 18 tankın orduya təhvil veriləcəyi gözlənilir.
21:28 28.09.2026
Oxunuş sayı: 37
