Mərakeşdə parlament seçkiləri keçirilir
Mərakeşdə parlamentin aşağı palatası olan 395 yerlik Nümayəndələr Palatasının yeni üzvlərinin seçilməsi üçün səsvermə keçirilir.
Crossmedia.az xəbər verir ki, “Anadolu” Agentliyi bu barədə məlumat yayıb.
Səsvermə yerli vaxtla saat 08:00-da başlayıb və saat 19:00-da başa çatacaq. Rəsmi məlumatlara görə, ölkədə 15 milyon 801 min 162 seçici qeydiyyatdan keçib. Seçkilərdə 28 siyasi partiya iştirak edir.
Seçkilərdə 2 min 658-i qadın olmaqla, ümumilikdə 7 min 288 namizəd mübarizə aparır.
Yeni hökumətin formalaşdırılması üçün Nümayəndələr Palatasında 198 deputatın dəstəyi tələb olunur.
Böyük şəhərlərin seçkilərdə rəqabətin daha intensiv olduğu bölgələrdən olacağı gözlənilir. Ölkənin ən böyük şəhəri olan Kasablanka parlamentə 57 deputat göndərdiyi üçün əsas seçki dairələrindən biri hesab olunur.
Paytaxt Rabat, həmçinin Fəs, Meknes, Mərakeş, Tanca və Aqadir də seçkilərin nəticələrinə təsir göstərə biləcək əsas bölgələr sırasında yer alır.
Mərakeşdə sonuncu parlament seçkiləri 8 sentyabr 2021-ci ildə keçirilib. Həmin seçkilərdə 102 deputat mandatı qazanan Milli Müstəqillər Birliyi Partiyası (RNI) birinci olub. Hökumət koalisiyasının tərəfdaşı olan Ədalət və Müasirlik Partiyası (PAM) 86, İstiqlal Partiyası isə 81 deputatla növbəti yerləri tutub.
13:58 23.09.2026
Oxunuş sayı: 41
