Bakıda “9-da işə başlamaq” dövrü bitir - Dövlət yeni sistemə keçir
Azərbaycan Respublikasının Prezidenti İlham Əliyev tərəfindən təsdiq olunmuş “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” nəqliyyat sıxlığının azaldılması dövlətin əsas prioritetlərindən biri kimi müəyyənləşdirilib. Bu məqsədlə dövlət qurumları, təhsil və tibb müəssisələri, eləcə də digər təşkilatlarda iş rejiminin dəyişkən iş qrafikinə uyğun təşkili nəzərdə tutulur.
Sentyabrın 15-də ali və orta məktəblərin fəaliyyətə başlaması ilə Bakıda insanların və nəqliyyatın hərəkətinin daha da intensivləşəcəyi, şəhərdə sıxlığın artacağı gözlənilir. Bu baxımdan nəqliyyat sıxlığının azaldılması istiqamətində konkret addımların atılması məsələsi yenidən gündəmə gəlir.
Bundan başqa, Bakı Metropoliteninin qrafikində dəyişiklik olunub. “28 May” və “Nizami” metro stansiyaları arasında qatarların hərəkəti dayandırılıb və sərnişinlər yerüstü nəqliyyata yönləndirilib. Bu vəziyyətin yollarda əlavə gərginlik və sıxlıq yaradacağı bildirilir.
Milli Məclisin deputatı Vüqar Bayramov Crossmedia.az-a açıqlamasında dəyişən iş qrafikinə keçidin Prezident tərəfindən təsdiq olunmuş Dövlət Proqramının əsas fəaliyyət istiqamətlərindən biri olduğunu bildirib: “Dəyişən iş qrafikinə keçid cənab Prezident tərəfindən təsdiq olunmuş Dövlət Proqramının əsas fəaliyyət istiqamətlərindən biridir. Və həmin proqrama əsasən bu istiqamətdə mexanizmin hazırlanması 2026-cı ildə başa çatmalıdır. Bu deməkdir ki, artıq biz növbəti ildən dəyişən iş qrafikinə keçidi müşahidə edə bilərik”.
Deputatın sözlərinə görə, bu istiqamətdə beynəlxalq təcrübə öyrənilir və aidiyyəti qurumlar tərəfindən mexanizmin hazırlanması ilə bağlı təkliflər təqdim olunur. O qeyd edib ki, əsas məqsəd tıxacların minimallaşdırılması və dövlət sektorunda sahələr üzrə dəyişən iş qrafikinin tətbiq edilməsidir: “Özəl sektor üçün də bu istiqamətdə tövsiyələr təqdim oluna bilər və həmin tövsiyələrə uyğun olaraq özəl sektor iş qrafikini müəyyənləşdirə bilər. Amma, təbii ki, əsas dövlət sektorunda sahələr üzrə dəyişən iş qrafikinə keçidin təmin edilməsidir”.
V.Bayramov vurğulayıb ki, Avropa ölkələri də daxil olmaqla bir sıra dövlətlərin təcrübələri öyrənilib və həmin təcrübələr nəzərə alınmaqla Azərbaycanda dəyişən iş qrafikinə keçidlə bağlı addımlar atılacaq: “Beynəlxalq təcrübə nəzərə alınmaqla, təbii ki, bu istiqamətdə fəaliyyətlər həyata keçiriləcək və gözlənilir ki, bu, bütövlükdə yaxın dövrlərdə Azərbaycanda dəyişən iş qrafikinə keçidi təmin edəcək. Bu da, təbii ki, fərqli sektorların və ya fərqli müəssisələrin fərqli saatlarda işə başlaması anlamına gələcək”.
Əmək və Əhalinin Sosial Müdafiəsi Nazirliyi sorğumuza cavab olaraq bildirib ki, Dövlət Proqramının həyata keçirilməsinə dair Tədbirlər Planına əsasən dövlət orqanlarının (qurumlarının), təhsil və tibb müəssisələrinin, habelə digər hüquqi və fiziki şəxslərin iş rejiminin dəyişkən iş qrafikinə əsasən təşkili ilə bağlı aparılan təhlillər tamamlanıb.
Nazirlikdən qeyd olunub ki, hazırda müvafiq siyahıların hazırlanması ilə bağlı aidiyyəti dövlət qurumları ilə müzakirələr davam etdirilir.
“Bununla bağlı yeniliklər olduqda ictimaiyyətə məlumat veriləcəkdir”, - deyə nazirlikdən bildirilib.
Səhiyyə Nazirliyi sorğumuza cavab olaraq bildirib ki, qurumun tabeliyində fəaliyyət göstərən tibb müəssisələri, o cümlədən elmi-tədqiqat institutları və ixtisaslaşmış mərkəzlər əhaliyə fasiləsiz tibbi xidmət göstərən səhiyyə profilli müəssisələrdir.
Nazirlikdən qeyd edilib ki, bu səbəbdən həmin müəssisələrin fəaliyyəti mövcud qanunvericiliyin və tibbi xidmətin spesifik xüsusiyyətlərinin tələblərinə uyğun olaraq növbəlilik prinsipi əsasında təşkil edilir: “Bildiririk ki, səhiyyə müəssisələrinin fəaliyyət rejimi ilk növbədə vətəndaşların tibbi yardıma əlçatanlığının və xidmətlərin fasiləsizliyinin təmin olunması zərurəti nəzərə alınmaqla müəyyən edilir. Bu sahədə hər hansı dəyişiklik yalnız müvafiq qaydada qəbul edilmiş qərarlar əsasında həyata keçirilə bilər.
Hazırda Nazirliyin tabeliyində olan tibb müəssisələrində tibbi xidmətlərin növbəlilik prinsipi əsasında fasiləsiz göstərilməsi davam etdirilir”.
Elm və Təhsil Nazirliyi isə sorğumuza cavab olaraq bildirib ki, məsələ hazırda icradadır. Nazirlikdən qeyd edilib ki, mövzu ilə bağlı yenilik olacağı təqdirdə ictimaiyyətə məlumat veriləcək.
Nigar Xəlilli
18:45 08.09.2026
Oxunuş sayı: 58
