Folklend UĞRUNDA MÜBARİZƏ YENİDƏN QIZIŞDI
Argentinada Folklend adaları ətrafında neft fəaliyyətinə görə 45 şəxs və şirkətə qarşı sanksiya prosesi başladılıb.
Crossmedia.az xəbər verir ki, Reuters bu barədə məlumat yayıb.
Argentina hökuməti Folklend adalarında, Buenos-Ayresin Malvin adaları adlandırdığı ərazidə icazəsiz karbohidrogen kəşfiyyatı və hasilatı həyata keçirməkdə şübhəli bilinən 45 fiziki və hüquqi şəxsə qarşı sanksiya proseduruna başlayıb.
Buenos-Ayres adalar üzərində suverenlik iddiasını davam etdirir və bölgədə Argentina hökumətinin icazəsi olmadan aparılan neft-qaz fəaliyyətini qanunsuz hesab edir.
Sanksiyaların əsas hədəflərindən biri Folklend adaları yaxınlığındakı “Sea Lion” neft layihəsidir. Layihədə Böyük Britaniyanın Rockhopper Exploration şirkəti və İsrailin Navitas Petroleum şirkəti iştirak edir. Layihənin ilk neft hasilatına 2028-ci ildə başlaması planlaşdırılır.
Argentina Prezidenti Xavyer Miley məsələ ilə bağlı daha sərt tədbirlərin görüləcəyini açıqlayıb. O, ölkəsinin Folklend adaları üzərindəki suverenlik iddiasını gücləndirmək üçün hüquqi və müdafiə tədbirlərinin də genişləndiriləcəyini bildirib.
Böyük Britaniya isə adalar üzərində suverenliyinin dəyişməz olduğunu bəyan edib. London Folklend adaları sakinlərinin öz müqəddəratını təyin etmək hüququnu əsas gətirərək Argentina ilə razılaşmır.
Beləliklə, neft ehtiyatlarının işlənməsi ilə bağlı mübahisə Argentina ilə Böyük Britaniya arasında uzun illərdir davam edən Folklend adaları üzrə suverenlik problemini yenidən gündəmə gətirib.
10:49 05.09.2026
Oxunuş sayı: 42
