Estoniyanın sabiq baş naziri Siim Kallas 78 yaşında vəfat edib
Estoniyanın sabiq baş naziri, Avropa Komissiyasının keçmiş vitse-prezidenti və İslahatlar Partiyasının qurucularından biri Siim Kallas 78 yaşında vəfat edib.
Crossmedia.az xəbər verir ki, “ERR.ee” bu barədə məlumat yayıb. Siyasətçinin vəfat etdiyini onun qızı, Avropa İttifaqının xarici siyasət və təhlükəsizlik siyasəti üzrə ali nümayəndəsi Kaya Kallas açıqlayıb. O, sosial şəbəkə hesabında atasının avqustun 22-nə keçən gecə vəfat etdiyini bildirib.
Siim Kallas 2002-2003-cü illərdə Estoniya hökumətinə rəhbərlik edib. O, 2004-2014-cü illərdə Avropa Komissiyasının vitse-prezidenti vəzifəsində çalışıb. Kallas 1995-1996-cı illərdə Estoniyanın xarici işlər naziri, 1999-2002-ci illərdə isə maliyyə naziri olub. Estoniyanın müstəqilliyinin bərpasından sonra, 1991-1995-ci illərdə Estoniya Bankına rəhbərlik edib. Bu vəzifədə çalışdığı dövrdə pul islahatının hazırlanmasında və 1992-ci ildə Estoniya kronunun dövriyyəyə buraxılmasında iştirak edib. Siim Kallas İslahatlar Partiyasının qurucularından biri olub və uzun illər partiyaya rəhbərlik edib.
16:15 22.08.2026
Oxunuş sayı: 59
