Rusiya MN: Ukrayna həftə ərzində 10 mindən çox hərbçi itirib
Ukrayna Silahlı Qüvvələri son bir həftə ərzində müxtəlif istiqamətlərdə 10 mindən çox hərbçi itirib.
Crossmedia.az xəbər verir ki, Rusiya Müdafiə Nazirliyi bu barədə məlumat yayıb.
Nazirliyin yeni brifinqində bildirilib ki, Rusiya Silahlı Qüvvələri bir həftə ərzində bir kütləvi və doqquz qrup zərbəsi endirib. Zərbələr nəticəsində Ukraynanın hərbi müəssisələri və logistika mərkəzlərinin vurulduğu qeyd olunub.
Rusiya tərəfinin məlumatına görə, yerüstü robot kompleksləri və pilotsuz katerlərin istehsalı sexləri, həmçinin “Flaminqo” raketlərinin hazırlanması və buraxılması məntəqələri də hədəfə alınıb.
Bundan başqa, Ukrayna limanlarının hərbi təyinatlı yüklərin boşaldılması və saxlanılması üçün istifadə olunan infrastruktur obyektlərinin vurulduğu bildirilib.
Nazirlik bir həftə ərzində Ukrayna Hərbi Dəniz Qüvvələrinə məxsus 2 patrul katerinin və Ukrayna Silahlı Qüvvələrinin maraqları naminə fəaliyyət göstərən 12 dəniz gəmisinin vurulduğunu açıqlayıb.
Rusiya Qara Dəniz Donanmasının isə həftə ərzində Ukraynaya məxsus 2 pilotsuz katerini məhv etdiyi bildirilib.
Rusiya Müdafiə Nazirliyinin məlumatına əsasən, həftə ərzində Ukrayna ordusunun itkiləri ayrı-ayrı istiqamətlər üzrə belə olub:
“Qərb” qoşun qruplaşmasının məsuliyyət zonasında 1 490-dan çox hərbçi;
“Şərq” qoşun qruplaşmasının məsuliyyət zonasında 2 340-dan çox hərbçi;
“Dnepr” qoşun qruplaşmasının məsuliyyət zonasında 260-dan çox hərbçi;
“Cənub” qoşun qruplaşmasının məsuliyyət zonasında 1 660-dan çox hərbçi;
“Mərkəz” qoşun qruplaşmasının məsuliyyət zonasında 2 550-dən çox hərbçi;
“Şimal” qoşun qruplaşmasının məsuliyyət zonasında 1 550-dək hərbçi.
Həmçinin “Cənub” qoşun qruplaşmasının məsuliyyət zonasında Qərb istehsalı olan 17 zirehli texnikanın, “Mərkəz” qoşun qruplaşmasının məsuliyyət zonasında isə Çexiya istehsalı “Vampire” reaktiv yaylım atəş sisteminin məhv edildiyi bildirilib.
Qeyd edək ki, bu məlumatlar Rusiya Müdafiə Nazirliyinin açıqlamasına əsaslanır. Ukrayna tərəfi bu itki rəqəmlərini müstəqil şəkildə təsdiqləməyib.
15:42 21.08.2026
Oxunuş sayı: 42
