Xarici xəbərlər

İsrail-Türkiyə qarşıdurması: müharibə ehtimalı artır?

İsrailin Suriyadakı hərbi bazaya endirdiyi son hava zərbəsi regionun hərbi baxımdan ən güclü iki dövləti – İsrail və Türkiyə arasında gərginliyi artırıb, lakin tərəflərin birbaşa müharibəyə başlaması hələlik real görünmür.

Crossmedia.az xəbər verir ki, “The Jerusalem Post” bu barədə məlumat yayıb.

İsrailin Suriyaya son hava zərbəsi Bəşər Əsədin 2024-cü ilin dekabrında hakimiyyətdən getməsindən sonra ölkənin gələcəyi ilə bağlı İsrail və Türkiyə arasında genişlənən qarşıdurmanın tərkib hissəsi kimi qiymətləndirilir.

Nəşrin məlumatına görə, bəzi İsrail rəsmiləri gələcəkdə Suriya ərazisində Türkiyə ilə birbaşa toqquşma ehtimalını da nəzərdən keçirirlər.

İsraildə Suriya ilə, yaxud eyni vaxtda Suriya və Türkiyə ilə mümkün müharibə barədə proqnozlar getdikcə daha çox səslənir. Buna səbəb Əhməd əş-Şaraanın rəhbərlik etdiyi yeni Suriya hökumətinin güclənməsi və bunun İsrail tərəfindən potensial təhlükə kimi qiymətləndirilməsidir.

İsraildə Suriya hakimiyyətini tənqid edənlər Dəməşqin Ankara ilə sıx münasibətlərinə diqqət çəkir və yeni hakimiyyəti “cihadçılar” adlandırırlar.

Türkiyədə hakim Ədalət və İnkişaf Partiyasının (AKP) “Müsəlman Qardaşları” hərəkatı ilə tarixi əlaqələrinin olması İsraildə əvvəlki İran təsir oxunu əvəz edə biləcək mümkün “sünni ittifaqı” ilə bağlı narahatlıqları artırır.

Bununla belə, İsrail mediasında səslənən sərt ritorika hələ real hərbi qarşıdurma demək deyil. Hazırda İsrail və Türkiyə arasında birbaşa müharibəyə gətirib çıxaracaq vəziyyət formalaşmayıb.

Mövzular:

İsrail Türkiyə müharibə qarşıdurma Suriya Dəməşq Ankara hərbi vəziyyət

🖨 Çap et

13:17 21.08.2026

Oxunuş sayı: 44