Niyazinin təsirini hər birimiz hiss edirik – Əyyub Quliyev
Bu gün Azərbaycanın görkəmli dirijoru, maestro Niyazinin doğum günüdür. Onun zəngin yaradıcılıq irsi və Azərbaycan musiqi mədəniyyətinin inkişafındakı xidmətləri bu gün də sənətkarlar tərəfindən böyük ehtiramla xatırlanır.
Azərbaycanın Əməkdar artisti Əyyub Quliyev Crossmedia.az-a açıqlamasında Maestro Niyazinin Azərbaycan dirijorluq məktəbindəki xüsusi rolundan danışıb:
“Bu gün, dahi dirijorumuz Azərbaycanın musiqi mədəniyyətinin ən görkəmli simalarından biri olan Maestro Niyazinin doğum günüdür. O, demək olar ki, bu gün Azərbaycanda fəaliyyət göstərən həm gənc, həm orta, həm də yaşlı nəsil dirijorlarının həyatında xüsusi iz qoymuş insandır. Maestro Niyazi pedaqoji fəaliyyətlə məşğul olmayıb, mənə elə gəlir ki, onun təsirini hər birimiz hiss edirik və hər zaman onun irsinə müraciət edirik”.
Əyyub Quliyev Maestro Niyazini şəxsən tanımaq ona nəsib olmasa da, ailəsinin sənətkarla bağlı xatirələrinin onun üçün xüsusi əhəmiyyət daşıdığını bildirib:
“Maestro Niyazini şəxsən görmək, tanımaq mənə nəsib olmasa da, mənim atam, görkəmli tarzən, Xalq artisti Ramiz Quliyevin Maestro Niyazi ilə xüsusi dostluğu var idi. Mən də o xatirələrlə böyümüşəm. Ramiz müəllim mənə həmişə danışırdı ki, onlar necə birlikdə konsertlərə hazırlaşırdılar. Maestro Niyazi bizim evimizdə dəfələrlə olub. Onun əlyazmaları da evimizdə qorunub saxlanılır”.
O, Maestro Niyazinin Azərbaycan musiqisinə və milli musiqi irsinə bağlılığını xüsusi vurğulayıb:
“Maestro Niyazinin Azərbaycan musiqisinə, Azərbaycan mədəniyyətinə, milli musiqi irsinə olan hörmətinin şahidi olmuşam. Bu insan həqiqətən qanı ilə, canı ilə xalqına, Vətəninə bağlı olan bir şəxsiyyət idi. Həyatının sonuna qədər də Vətəninə xidmət edib”.
Əyyub Quliyev qeyd edib ki, Niyazinin sənətinə olan böyük ehtiram yalnız Azərbaycanda deyil, xarici ölkələrdə də bu günə qədər qorunub saxlanılır:
“Mən xarici ölkələrdə hər dəfə hansısa konsert salonlarına gedəndə, qapını açıram, onun şəkillərini, fotolarını görürəm. Onun necə böyük ehtiramla yad edildiyinin şahidi oluram. Sonuncu dəfə Ankarada olanda filarmoniya salonuna daxil oldum və Maestronun şəklini gördüm. Türk qardaşlarımız mənə dedi ki, Maestro Niyazi onların əsərlərinin premyeralarını həyata keçirmiş bir şəxsiyyət olub”.
Sənətçi bildirib ki, Maestro Niyaziyə olan sevgi və ehtiram gələcək nəsillərdə də yaşadılacaq:
“Ona hər zaman böyük ehtiram var, hər zaman böyük sevgi var. O sevgini biz həmişə ürəyimizdə yaşadıb qoruyacağıq. Nə qədər ki, Azərbaycan xalqı var, Maestro Niyazinin xatirəsi də yaşayacaq. Allah ona rəhmət eləsin”.
Nigar Xəlilli
12:50 20.08.2026
Oxunuş sayı: 34
