Anomal istilər Avropada xizək mövsümünü dayandırır: daha bir buzlaq bağlandı
Anomal yüksək temperatur İtaliya Alplarında yerləşən Stelvio buzlağında yay xizək mövsümünün dayandırılmasına səbəb olub.
Crossmedia.az xəbər verir ki, bu barədə ˝ANSA˝ məlumat yayıb.
Bundan əvvəl İsveçrədə Matterhorn və İtaliyada Ponte di Legno-Tonale xizək zonalarında da yay mövsümü bağlanıb. Mütəxəssislər bildirirlər ki, gün ərzində havanın həddindən artıq isinməsi səbəbindən gecə temperaturu buzlağın bərpası üçün kifayət qədər aşağı düşmür.
Stelvioda kanat yollarını idarə edən Sifas şirkətinin açıqlamasına görə, mövcud hava şəraiti yay xizəkçiliyi üçün tələb olunan keyfiyyət və ən əsası təhlükəsizlik standartlarını təmin etməyə imkan vermir.
Şirkətin məlumatına görə, avqustun 15-dən etibarən buzlaqdakı xizək trasları qeyri-müəyyən müddətə bağlanıb. Bununla belə, kanat yolları fəaliyyətini davam etdirir və turistlər əraziyə piyada səyahət məqsədilə qalxa bilərlər.
Sifas hava şəraitini və buzlağın vəziyyətini daim izləyəcəyini, temperaturun aşağı düşəcəyi və trasların yenidən istifadəyə verilə biləcəyi təqdirdə bu barədə məlumat yayacağını bildirib.
Matterhornda isə yay xizəkçiliyi daha əvvəl – iyulun 31-də dayandırılıb. İsveçrənin Zermatt Bergbahnen şirkəti təxminən 3 min metr yüksəklikdə yerləşən Teodul buzlağındakı xizək traslarının bağlandığını açıqlayıb. İtaliya tərəfindən Brey-Çerviniyadan Platо-Roza istiqamətində kanat yolları işləsə də, onlardan yalnız piyadalar istifadə edə bilir.
Oxşar vəziyyət Mont Blandakı buzlaqlarda da müşahidə olunur. Təhlükəsizlik səbəbilə dağın İtaliya tərəfindən qalxışlar müvəqqəti dayandırılıb, Fransada isə Tet-Rus və Qute dağ sığınacaqları bağlanıb.
Fransada anomal hava şəraiti ciddi mübahisəyə də səbəb olub. Ferraqosto bayramı ərəfəsində 32 turist dağdan enmək üçün helikopter sifariş etməli olub. Onların rəsmi qadağalara baxmayaraq təhlükəli əraziyə qalxdığı bildirilib. Buna görə Sen-Jerve kommunasının meri xilasetmə əməliyyatından imtina edib. Qərar Fransada ciddi tənqid olunub.
Hazırkı temperatur şəraitinə görə İtaliyada açıq havada xizək sürmək üçün uyğun buzlaq demək olar ki, qalmayıb. Məsələn, 2 min metrdən yüksək yüksəklikdə yerləşən Forni buzlağının yaxınlığındakı meteoroloji stansiyada 17 dərəcə, təxminən 3 min metr yüksəklikdə yerləşən Marinelli aşırımında isə 9 dərəcə temperatur qeydə alınıb.
Problem yalnız İtaliya ilə məhdudlaşmır. Anomal isti hava səbəbindən İsveçrə, Fransa və Avstriyanın, eləcə də Norveçin bəzi buzlaqlarında yay xizək mövsümü dayandırılıb.
Beləliklə, hazırda Avropada yay aylarında xizək sürmək istəyənlər üçün əsas seçim qapalı xizək kompleksləri olaraq qalır.
07:30 18.08.2026
Oxunuş sayı: 53
