Son zamanlar yüksəlişdə olan Çinli texnologiya nəhəngi “Huawei”, yeni məhsulları ilə diqqət çəkməyə davam edir. Şirkət, bu uğurunu ikinci nəsil “MatePad Pro 13.2” modeli ilə təsdiqləmək niyyətindədir.
“Huawei” 26 noyabr 2024-cü ildə keçirəcəyi genişmiqyaslı tədbirdə yeni məhsullarını tanıtmağa hazırlaşır. Bu tədbirdə “Mate 70” seriyası, “Mate X6” qatlanan telefon, 4-cü nəsil “FreeBuds Pro” simsiz qulaqcıqlar və ikinci nəsil “MatePad Pro 13.2” modelinin təqdim olunması gözlənilir.
İlk nəsil “MatePad Pro” 2023-cü ilin sentyabrında “Kirin 9000s” prosessoru ilə bazara çıxmışdı. İkinci nəsil modelin isə təkmilləşdirilmiş “Kirin 9010” və ya yaxın zamanda təqdim olunması planlaşdırılan “Kirin 9100” prosessoru ilə gələcəyi bildirilir. 6 nm istehsal prosesi ilə hazırlanan “Kirin 9100”, 2.67 GHz tezliyində çalışan “Cortex-X1” nüvəsi ilə yüksək performans təklif edir.
Yeni modeldə 2880 x 1920 piksel çözünürlükdə, 13.2 düym “OLED” ekran istifadə olunur. 3.4 mm incə çərçivələr sayəsində cihaz %94 ekran-gövdə nisbətinə malikdir. Ekranın 144 Hz yeniləmə tezliyi və “HDR” dəstəyi sayəsində yüksək keyfiyyətli görüntü təcrübəsi təqdim olunur. Tabletin çəkisi cəmi 580 qram, qalınlığı isə 5.5 mm-dir ki, bu da onu həm portativ, həm də zərif edir.
10.100 mAh tutumlu batareya cihazın uzun müddət istifadəsinə şərait yaradır. 88W sürətli enerji yükləmə dəstəyi ilə də diqqət çəkir. 16 GB “LPDDR4x RAM” və 1 TB “UFS 3.1” yaddaşı isə geniş saxlama imkanları təmin edir.
Tablet, “HarmonyOS 4.0” əməliyyat sistemi ilə işləyir və altı dinamikdən ibarət zəngin səs təcrübəsi təqdim edir. Bundan əlavə, cihaz “Huawei”-nin “StarLight” texnologiyası ilə təchiz olunub və 10.000 təzyiq səviyyəsini dəstəkləyən 3-cü nəsil “M-Pencil” qələm ilə gəlir.
Kamera xüsusiyyətləri:
16 MP ön kamera və 3D “ToF” sensoru, arxada isə 13 MP əsas sensor və 8 MP ultra geniş bucaqlı kamera mövcuddur.
Sevinc Abuşova
