Bioloqun qeyri-adi üsulu nəsli təhlükə altında olan leyləklərinin sayını artırıb
ABŞ-nin Corciya ştatında bioloq Con Robinet ağac leyləklərinin koloniyasını xilas etmək üçün qeyri-adi üsula əl atıb.
Crossmedia.az ˝Unian˝-a istinadən xəbər verir.
O, quşların yuva qurması üçün süni ağac konstruksiyaları yaradaraq onların sayının artmasına kömək edib.
Məlumata görə, ilk ağac leyləkləri 1987-ci ildə Harris-Neck Milli Vəhşi Təbiət Qoruğundakı gölməçədə məskunlaşıb. Həmin vaxt 18 yuvada 43 bala dünyaya gəlib.
Lakin növbəti il vəziyyət pisləşib. Gölməçədə suyun səviyyəsi aşağı düşdükdən sonra yenotlar yuvalara çata bilib və quş balalarını məhv etməyə başlayıb.
Ağac leyləkləri adətən dərin suda yerləşən ağaclarda yuva qurur. Su ilə əhatələnmiş ərazi onları yırtıcılardan qoruyur. Buna görə də qoruq əməkdaşları gölməçədə su səviyyəsini təxminən 1,8 metr artırıblar.
Lakin bu dəfə başqa problem yaranıb: ağacların əksəriyyəti uzunmüddətli su altında qalmağa dözməyərək qurumağa başlayıb.
Bioloq Con Robinet 1990-cı illərin əvvəlində maraqlı təklif irəli sürüb. O, məhv olan ağacları süni konstruksiyalarla əvəz etməyi təklif edib. Qoruq əməkdaşları taxta, metal çubuqlar və torlardan altı süni yuva qurğusu hazırlayıblar.
Ərazidə eyni zamanda suya davamlı sərv ağacları da əkilib. Plan ondan ibarət olub ki, zamanla böyüyən ağaclar süni konstruksiyaları əvəz etsin.
Lakin leyləklər gözləməyib. Quşlar bioloqun hazırladığı süni qurğulardan dərhal yuva qurmaq üçün istifadə etməyə başlayıblar.
Nəticə illər ərzində özünü göstərib. 2002-ci ildə Vudi-Pond ərazisində balaların sağ qalma göstəricisi yaxın koloniyalarla müqayisədə təxminən 20 faiz yüksək olub.
2012-ci ildə isə bioloqlar burada 484 yuva qeydə alıblar. Müqayisə üçün, 1987-ci ildə cəmi 18 yuva var idi. Beləliklə, 25 il ərzində yuvaların sayı təxminən 27 dəfə artıb.
23:58 12.08.2026
Oxunuş sayı: 44
