“Ailə dəyərləri və onların qorunması” mövzusunda dəyirmi masa keçirilib
Sosial Mədəni Dəyişikliklərin Öyrənilməsi İctimai Birliyinin təşkilatçılığı ilə oktyabrın 22-də “Ailə dəyərləri və onların qorunması” mövzusunda dəyirmi masa keçirilib.
Tədbirdə ailə institutunun cəmiyyətin sosial-mədəni inkişafında rolu, milli və mənəvi dəyərlərin qorunması, valideyn-övlad münasibətləri, ailədə qarşılıqlı hörmət və məsuliyyət, gənclərin ailə həyatına hazırlanması, müasir informasiya və sosial media mühitinin ailə münasibətlərinə təsiri, eləcə də qlobal mədəni proseslərin ailə dəyərlərinə təsiri məsələləri ətrafında fikir mübadiləsi aparılıb.
Tədbiri giriş sözü ilə açan Sosial Mədəni Dəyişikliklərin Öyrənilməsi İctimai Birliyinin sədri, fəlsəfə doktoru Hüseyn İbrahimov ailə dəyərlərinin qorunmasının cəmiyyətin sosial sabitliyi və milli-mənəvi inkişafı baxımından xüsusi əhəmiyyət daşıdığını bildirib.
O qeyd edib ki, ailə yalnız insanların birgə yaşadığı sosial institut deyil, eyni zamanda milli-mənəvi dəyərlərin, adət-ənənələrin, dilin, mədəni irsin və davranış normalarının nəsildən-nəslə ötürüldüyü əsas mühitdir. Onun sözlərinə görə, müasir dövrdə qloballaşma, sürətli informasiya mübadiləsi və müxtəlif mədəni təsirlərin artması ailə münasibətlərində yeni yanaşmaların formalaşmasına səbəb olur.
Hüseyn İbrahimov vurğulayıb ki, ailə dəyərlərinin qorunması müasir inkişafdan təcrid olunmaq anlamına gəlməməlidir. Əksinə, milli-mənəvi dəyərlərlə müasir həyatın tələbləri arasında sağlam balansın yaradılması mühüm vəzifələrdən biridir. Bu baxımdan ailədə qarşılıqlı hörmət, etimad, məsuliyyət, mərhəmət və həmrəylik kimi dəyərlərin möhkəmləndirilməsi xüsusi əhəmiyyət daşıyır.
Dəyirmi masada çıxış edən dosent Zeynəddin Şabanov ailə institutunun cəmiyyətin mənəvi və sosial strukturunda mühüm yer tutduğunu qeyd edib. O bildirib ki, ailənin dayanıqlılığı yalnız iqtisadi amillərlə deyil, həm də ailə üzvləri arasında münasibətlərin keyfiyyəti, qarşılıqlı anlayış və mənəvi bağlılıqla müəyyən olunur.
Dosent Zeynəddin Şabanov müasir dövrdə ailə münasibətlərinə təsir göstərən sosial və mədəni dəyişikliklərin elmi baxımdan öyrənilməsinin vacibliyini vurğulayaraq, xüsusilə gənc nəslin ailə dəyərlərinə münasibətinin formalaşdırılmasında təhsil və maarifləndirmə tədbirlərinin roluna diqqət çəkib.
Siyasi ekspert və QHT sədri Taleh Əliyev çıxışında müasir informasiya məkanının və qlobal mədəni proseslərin ailə münasibətlərinə təsirindən danışıb. O qeyd edib ki, rəqəmsal texnologiyaların və sosial medianın geniş yayılması insanların ünsiyyət və həyat tərzində ciddi dəyişikliklər yaradıb. Bu dəyişikliklər bir tərəfdən yeni imkanlar yaratsa da, digər tərəfdən ailə daxilində ünsiyyətin zəifləməsi, nəsillərarası fikir ayrılıqlarının artması və milli-mənəvi dəyərlərə münasibətdə müəyyən dəyişikliklərin meydana çıxması kimi problemlər doğura bilər.
Taleh Əliyev vurğulayıb ki, ailə dəyərlərinin qorunması istiqamətində yalnız inzibati və ya formal tədbirlərlə kifayətlənmək olmaz. Bu istiqamətdə davamlı maarifləndirmə, gənclərlə iş, valideynlərin sosial və psixoloji maarifləndirilməsi, sağlam ailə münasibətlərinin təşviqi və milli-mədəni irsin təbliği mühüm əhəmiyyət daşıyır.
Çıxış zamanı o, xüsusilə gənclər arasında ailə məsuliyyəti, qarşılıqlı hörmət, tolerantlıq, əməkdaşlıq və sağlam ünsiyyət mədəniyyətinin formalaşdırılmasının vacibliyini qeyd edib.
Dəyirmi masa iştirakçıları bildiriblər ki, ailə dəyərlərinin qorunması yalnız ailənin deyil, bütövlükdə cəmiyyətin məsuliyyətidir. Bu baxımdan dövlət qurumları, vətəndaş cəmiyyəti institutları, təhsil müəssisələri, media və ictimaiyyət arasında əməkdaşlığın genişləndirilməsi mühüm nəticələr verə bilər.
Tədbirdə həmçinin ailə dəyərlərinin xüsusilə kənar və mənfi mədəni təsirlərdən qorunması, milli-mənəvi irsin gənc nəslə düzgün çatdırılması, ailədə sağlam həyat tərzinin təşviqi, valideyn-övlad münasibətlərinin möhkəmləndirilməsi və ailədaxili ünsiyyət mədəniyyətinin inkişaf etdirilməsi ilə bağlı geniş fikir mübadiləsi aparılıb.
İştirakçılar qeyd ediblər ki, qloballaşma şəraitində milli ailə modelinin qorunması digər mədəniyyətlərlə qarşıdurma yaratmaq deyil, milli kimliyi və mənəvi dəyərləri qorumaqla yanaşı, müasir dünyanın müsbət təcrübələrindən səmərəli istifadə etmək deməkdir.
Sonda ailə institutunun möhkəmləndirilməsi, milli-mənəvi dəyərlərin qorunması və bu sahədə ictimai maarifləndirmənin genişləndirilməsi istiqamətində belə müzakirələrin davam etdirilməsinin vacibliyi vurğulanıb.
10:13 22.10.2025
Oxunuş sayı: 13
