Zəhər sayılırdı, bu gün isə hər süfrənin vazkeçilməzidir
Bu gün gündəlik qidalanmanın ayrılmaz hissəsinə çevrilən bir çox ərzaq məhsulu keçmişdə insanlar tərəfindən ehtiyatla qarşılanırdı. Bəziləri zəhərli hesab edilir, bəziləri xəstəlik və hətta dəliliklə əlaqələndirilir, digərləri isə uzun müddət qadağalar və cəmiyyətin mənfi münasibəti ilə üzləşirdi.
Crossmedia.az xəbər verir ki, "Habertürk" bu barədə məlumat yayıb.
Mənbənin hazırladığı araşdırmaya görə, bu gün dünyanın əksər mətbəxlərində geniş istifadə olunan pomidor, kartof, badımcan, qəhvə və göbələk kimi məhsulların süfrələrə gedən yolu heç də asan olmayıb.
Pomidor XVI əsrdə Amerikadan Avropaya gətirilsə də, itüzümü fəsiləsinə aid olduğu üçün uzun müddət zəhərli hesab edilib. Sonradan isə xüsusilə Aralıq dənizi mətbəxinin ayrılmaz hissəsinə çevrilib.
Kartof da Avropada ilk illərdə cüzam və digər xəstəliklərlə əlaqələndirilirdi. Fransız alim Antuan-Ogüsten Parmentyenin apardığı maarifləndirici işlərdən sonra kartof təhlükəsiz və qidalı məhsul kimi qəbul olunmağa başlayıb.
Badımcan görünüşü və eyni bitki ailəsinə mənsub olması səbəbindən Avropada "dəli alma" kimi tanınıb. Lakin zaman keçdikcə xüsusilə Aralıq dənizi və Şərq mətbəxlərində əsas tərəvəzlərdən birinə çevrilib.
Qəhvə isə yalnız içki deyil, həm də ictimai həyatın bir hissəsi kimi müxtəlif dövrlərdə dini və siyasi qadağalarla üzləşib. Buna baxmayaraq, qısa müddətdə Avropanın ən məşhur içkilərindən biri olub.
Göbələk qədim dövrlərdən istehlak olunsa da, bəzi növlərinin zəhərli olması və gecələr qəfil meydana çıxması ilə bağlı inanclar səbəbindən uzun illər sirli və təhlükəli məhsul hesab edilib. Buna baxmayaraq, bir çox ölkədə yüksək qiymətləndirilən qida məhsuluna çevrilib.
Araşdırmada qeyd olunur ki, elmi biliklərin artması, qidalanma vərdişlərinin dəyişməsi və cəmiyyətin stereotiplərdən uzaqlaşması nəticəsində vaxtilə təhlükəli hesab edilən bu məhsullar bu gün dünyanın ən çox istehlak olunan qidaları sırasındadır.
08:50 06.08.2026
Oxunuş sayı: 49
