Avropanın qaz ehtiyatları son illərin ən aşağı səviyyəsinə düşüb
Avropa İttifaqı ölkələrinin yeraltı qaz anbarlarına (YQA) vurduğu qazın həcmi qarşıdakı qış mövsümü üçün tələb olunan səviyyədən xeyli geri qalır. Mövcud göstəricilər Avropanın son illərin ən aşağı qaz ehtiyatları ilə istilik mövsümünə başlamaq riski ilə üzləşdiyini göstərir.
Crossmedia.az xəbər verir ki, "ТАSS" bu barədə Gas Infrastructure Europe (GIE) məlumatlarına əsaslanan hesablamalara istinadən məlumat yayıb.
Məlumata görə, 2026-cı ilin aprelindən başlayan yay mövsümündən indiyədək Avropa ölkələrinin yeraltı qaz anbarlarına xalis vurduğu qazın həcmi 32 milyard kubmetri ötüb. Bununla belə, bu göstərici qarşıdakı qış üçün tələb olunan ümumi ehtiyatın yalnız 47 faizinə bərabərdir.
Hazırda Avropanın qaz anbarları orta hesabla 57,39 faiz doludur. Bu göstərici son beş ilin eyni tarixi üzrə orta səviyyədən 16,45 faiz aşağıdır. Müqayisə üçün, ötən ilin eyni dövründə anbarların doluluq səviyyəsi 69,3 faiz təşkil edib.
Qeyd olunur ki, bu, 2011-ci ildən aparılan müşahidələr üzrə həmin tarix üçün ən aşağı göstəricidir. Hazırda Avropa İttifaqının qaz anbarlarında təxminən 62,7 milyard kubmetr qaz var ki, bu da ötən illə müqayisədə 13,3 milyard kubmetr azdır.
Avropa Komissiyasının tələblərinə əsasən, Aİ ölkələri hər il oktyabrın 1-dən dekabrın 1-dək qaz anbarlarını 90 faiz səviyyəsində doldurmalıdır. Çətin şərait yarandıqda isə 10 faizlik çeviklik tətbiq oluna bilər.
Ekspertlərin hesablamalarına görə, 2026-2027-ci illərin payız-qış mövsümünə hazırlıq üçün Avropa qaz anbarlarına əlavə olaraq ən azı 68 milyard kubmetr qaz vurulmalıdır.
Məlumata görə, bu il qaz ehtiyatlarının bərpasına bir neçə amil mənfi təsir edib. Bunlar arasında Yaxın Şərqdəki münaqişə dövründə mayeləşdirilmiş təbii qaz (LNG) bazarında Asiya ilə rəqabətin güclənməsi, yanacağın qiymətlərinin artması və iyun-iyul aylarında müşahidə olunan güclü istilər göstərilir.
Yüksək temperatur dövründə kondisioner və soyutma sistemlərinə tələbatın artması elektrik enerjisi istehlakını yüksəldir. Qaz isə Avropada atom, külək və günəş enerjisi ilə yanaşı, elektrik istehsalının əsas mənbələrindən biri olaraq qalır.
12:23 04.08.2026
Oxunuş sayı: 56
