"Wildberries" satıcılarının zərəri 280 milyard rubla çatıb
Ukrayna pilotsuz uçuş aparatlarının (PUA) hücumları nəticəsində "Wildberries" marketpleysinin satıcılarının ümumi zərərinin 280 milyard rubl (təxminən 5,97 milyard manat və ya 3,51 milyard ABŞ dolları) olduğu qiymətləndirilir.
Crossmedia.az xəbər verir ki, "Data Insight" tədqiqat agentliyi bu barədə qiymətləndirmə yayıb.
Agentliyin hesablamalarına görə, qiymətləndirmə 2024-cü ildə Şuşarı anbarında baş vermiş iri yanğının nəticələri əsasında aparılıb. Həmin vaxt 112 min kvadratmetr sahənin məhv olmasına görə 35 milyard rubl sığorta ödənişi həyata keçirilmişdi.
Bildirilir ki, son PUA hücumları nəticəsində ümumi sahəsi 1,2 milyon kvadratmetrdən çox olan anbar və logistika obyektlərinə ziyan dəyib ki, bu da şirkətin logistika infrastrukturunun əhəmiyyətli hissəsini əhatə edir.
Bundan əlavə, zədələnmiş bina və infrastrukturun bərpası üçün tələb olunan vəsaitin 80,8 milyard rubl (təxminən 1,72 milyard manat və ya 1,01 milyard ABŞ dolları) olduğu bildirilir.
Məlumata görə, "Wildberries" şirkəti mallarını itirən satıcılara kompensasiya ödəməkdən imtina edib. Şirkət müqavilə şərtlərinə dəyişiklik edərək PUA hücumlarını fors-major halı kimi qiymətləndirib və yaranan itkilərin sahibkarların öz kommersiya riski olduğunu bildirib.
Şirkət vurğulayıb ki, bəzi kiçik biznes nümayəndələrinə edilən ödənişlər hüquqi öhdəlik deyil, yalnız xoşməramlı addımdır. Bu mövqe isə satıcılar arasında narazılığa səbəb olub.
17:51 03.08.2026
Oxunuş sayı: 55
