Xarici xəbərlər

Fransada meşə yanğınları ilə bağlı 375 nəfər saxlanılıb

Fransada yay mövsümünün əvvəlindən indiyədək meşə yanğınlarında əli olmaqda şübhəli bilinən 375 nəfər saxlanılıb. Onların 142-si azyaşlıdır.

Crossmedia.az xəbər verir ki, "BFMTV" bu barədə Fransanın Daxili İşlər Nazirliyinə istinadən məlumat yayıb.

Məlumata görə, saxlanılanlardan 36 nəfər barəsində həbs qətimkan tədbiri seçilib. Onlardan bəziləri artıq məhkəmə hökmü ilə cəza çəkməyə başlayıb, digərləri isə məhkəməni gözləyir.

Daxili İşlər Nazirliyinin məlumatına əsasən, meşə yanğınlarının təxminən üçdə ikisi qəsdən törədilən yanğınlar nəticəsində baş verib. Digər hallar isə əsasən ölkənin böyük hissəsində müşahidə olunan ekstremal isti hava və quraqlıqla əlaqələndirilir.

Bildirilir ki, azyaşlıların şübhəli bilindiyi üç böyük yanğın En, Var və Jironda departamentlərində qeydə alınıb.

En departamentində iyunun sonunda Divonn-le-Ben qəsrinin böyük hissəsi yanıb. Hadisə ilə bağlı 15 və 16 yaşlı iki yeniyetmə qəsdən yanğın törətməkdə, üçüncü yeniyetmə isə alovun söndürülməsinə cəhd göstərməməkdə şübhəli bilinir. Onlar məhkəmə nəzarəti altında sərbəst buraxılıblar.

Var departamentində isə iyulun 25-də 15 yaşlı yeniyetmə meşə yaxınlığında iki yanğın törətməkdə şübhəli bilinərək saxlanılıb. O bildirib ki, ilk yanğın sönməmiş siqaretin təsadüfən atılması nəticəsində baş verib, ikinci hadisədə isə şam qozalarını alışqanla yandırıb. Yeniyetmə oktyabrın 22-də məhkəmə qarşısına çıxacaq.

Jironda departamentində 15 yaşlı yeniyetmə yaşadığı evin yaxınlığında kol-kosu yandırmağa cəhd edərkən saxlanılıb və məhkəməyədək həbs edilib.

Şərqi Pireney departamentinin Ameli-le-Ben-Palalda şəhərində isə iyulun 27-də 10 və 13 yaşlı iki uşaq bələdiyyəyə məxsus binanı yandırmaqda şübhəli bilinərək saxlanılıb. Hadisədən sonra şəhər meri sentyabrın 1-dək azyaşlılar üçün saat 23:00-dan 06:00-dək komendant saatı tətbiq edib.

🖨 Çap et

16:56 03.08.2026

Oxunuş sayı: 57